PWD na pitong taon nang nagtitinda, natulungan ng mga nagmalasakit na netizens

Tuesday, March 09, 2021 at 5:41 PM by Marisse Gulferica

- Viral ang post tungkol sa isang PWD na matiyaga pa ring naglalako ng mga panlahok at pampalasa sa pagluluto

- Pitong taon na umanong naglalako ang PWD na hirap magsalita at halos paralisa na ang kalahating katawan

- Madalas din daw itong lokohin dahil sa kanyang kalagayan ngunit tuloy parin siya sa pagtitinda para may makain

- May mga nagmalasakit na netizen na nagpadala na ng tulong pinansyal para sa kanya

Viral ang post tungkol sa isang PWD na naglalako sa Payatas ng mga panlahok at pampapalasa sa pagluluto.

Nalaman ng KAMI na hirap itong magsalita at paralisa na halos ang kalahating katawan ngunit patuloy pa rin ito sa paglalako.

Sa post na ibinahagi ni Melbert Carreon, naikwento niyang pitong taon na niyang nakikita na matiyagang naglalako ang PWD.

Read also

Sharon Cuneta, sinupalpal ang basher na nanghamak sa kanya

Sa kabila ng kalagayan nito, patuloy na nagtitinda ang PWD dahil ito ang pinagkukunan niya ng pambili ng makakain sa pang-araw araw.

Madalas pa raw itong lokohin at tuksuhin dahil sa kanyang itsura at sitwasyon pero balewala na lamang daw sa tindero dahil kailangan nitong kumita.

Noong panahon na nalagay sa enhanced community quarantine ang Metro Manila, hirap lalo ang kalagayan ng PWD dahil hindi siya makapaghanapbuhay.

Araw-araw, nagbubuhat daw ito ng mga panindang kamatis, asin, at kalamansi na nakalagay sa malaking basket.

Nang kausapin siya ni Melbert, nagpatulong pa raw itong makapagsulat sa kanya upang makahingi ng kariton na mapaglalagyan niya ng kanyang paninda.

At dahil sa nag-viral ang post ni Melbert, marami ang tumugon at nagpadala ng tulong pinansyal.