Anthony Pangilinan, ibinahagi ang naging mungkahi ng anak para makatulong

• Nag-anunsyo si Anthony Pangilinan ng bawas na P3.00 kada litro sa presyo ng diesel sa kanilang gasolinahan sa South Forbes simula ngayong Marso 17
• Ibinahagi ng batikang motivational speaker na ang kanyang anak at business partner ang nakaisip ng nasabing hakbang para makatulong sa komunidad
• Inamin ni Anthony na bagama’t hindi paborable sa usaping kita ang desisyon ay mas pinili nilang sumunod sa kanilang misyon na suportahan ang mga nangangailangan
• Patuloy na ipatutupad ang nasabing rollback hangga’t kaya ng kanilang operasyon bilang pakikiisa sa nararanasang hirap ng mga motorista dahil sa taas ng presyo ng langis

Sa gitna ng patuloy na hamon ng pagtaas ng presyo ng bilihin at langis, isang magandang balita ang ibinahagi ng pamilya Pangilinan na tiyak na magbibigay-ginhawa sa maraming motorista.

Sa kanyang Facebook post, inihayag ni Anthony Pangilinan ang kanilang naging desisyon matapos suriin ang kasalukuyang presyo ng langis at ang epekto nito hindi lamang sa kanilang negosyo kundi sa buong komunidad. Ayon sa kanya, ang kanyang anak—na itinuturing din niyang partner sa negosyo—ang nagmungkahi ng isang hakbang na bagama’t "hindi pabor sa numero" ay 100% namang swak sa kanilang misyon.

Read also

"Nag-start ako sa ‘Bulaga’ 1994 as a PA..." Jose Manalo, binalikan ang kanyang humble beginnings

“Assessed fuel prices and its effect on our business, but more importantly, our community. Our partner (yes, my son!) suggested a move that didn't make sense 'numbers wise' but was 100% in sync with our mission: support those who need it most in the community,” ani Anthony sa kanyang post.

Dahil dito, simula nitong Marso 17, nagpatupad sila ng bawas na P3.00 kada litro sa kanilang mga diesel products sa kanilang gas station na matatagpuan sa South Forbes. Layunin nito na kahit papaano ay maibsan ang pasanin ng mga taong labis na naaapektuhan ng mahal na krudo.

Dagdag pa ni Anthony, pananatilihin nila ang ganitong sistema hangga't kaya ng kanilang kapasidad bilang isang negosyo. Naniniwala siya na sa panahong ito, mahalaga ang pagtutulungan ng bawat isa. “Starting tomorrow, March 17, we cut P3.00 per liter from our regular prices for diesel products in our station in South Forbes. Will keep it running for as long as we are able. Let's all do what we can, while we can, for as long as we are able,” dagdag pa niya.

Si Anthony Pangilinan ay kilala bilang isang mahusay na motivational speaker at business consultant, habang ang kanyang anak na si Donny Pangilinan ay isa sa mga pinakasikat na aktor sa kasalukuyang henerasyon. Ang kanilang pamilya ay kilala sa pagiging aktibo sa mga adbokasiya at pagtulong sa kapwa, kaya naman hindi na nakapagtataka ang naging hakbang na ito na inuna ang kapakanan ng komunidad bago ang malaking kita.

Read also

Divorce nina Aiai Delas Alas at Gerald Sibayan, opisyal na matapos ang desisyon ng korte sa Amerika

Ang ganitong uri ng pamumuno sa negosyo ay nagpapakita na sa kabila ng kumpetisyon sa merkado, may puwang pa rin para sa pagmamalasakit at tunay na serbisyo.

Bukod sa kanilang mga inisyatibo sa negosyo, ang pamilya Pangilinan ay dumaan din sa mga pagsubok na lalong nagpatatag sa kanilang samahan bilang isang pamilya.

Matatandaang naging emosyonal ang marami nang mabalitang kinailangang sumailalim sa isang operasyon sa puso si Anthony Pangilinan. Ang nasabing kaganapan ay naging mitsa upang mas lalong ipakita ng kanyang mga anak at ng asawang si Maricel Laxa ang kanilang suporta at pagmamahal para sa haligi ng kanilang tahanan.

Sa kabila ng mga pagsubok, hindi nakakalimot si Donny Pangilinan na magbigay-pugay sa kanyang mga magulang, gaya na lamang ng kanyang sweet birthday post para sa ina na si Maricel Laxa. Sa nasabing post, ipinakita ng aktor ang kanyang pagpapahalaga sa mga sakripisyo ng kanyang ina, na naging inspirasyon din niya sa kanyang mga ginagawang pagtulong sa kapwa ngayon.

Source: KAMI.com.gh