23 estudyante sugatan matapos mawalan ng preno ang trak sa Catanduanes

• Sugatan ang 23 estudyante matapos mawalan ng preno at tumagilid ang trak na sinasakyan nila sa Barangay Milaviga, Caramoran, Catanduanes
• Galing ang trak sa Caramoran at patungo sa Virac para ihatid ang mga estudyante sa pagbabalik ng klase sa Lunes ayon sa pulisya
• Ang mga biktima ay dinala sa Caramoran Municipal Hospital at anim sa kanila ang sumailalim sa CT scan dahil sa tindi ng tama
• Sugatan din ang drayber at pahinante ng trak at nagpaalala ang mga awtoridad na siguraduhing nasa maayos na kondisyon ang sasakyan bago bumiyahe

Isang nakakatakot na aksidente ang naganap nitong Linggo ng umaga sa Barangay Milaviga, Caramoran, Catanduanes, matapos mawalan ng preno ang isang trak na sakay ang mga estudyante.

Umabot sa 23 kabataan ang sugatan nang tumagilid ang naturang sasakyan habang binabagtas ang pababang bahagi ng kalsada ayon sa ulat ng ABS-CBN News.

Ayon kay Police Capt. Jumar Delavin, hepe ng Caramoran police, nangyari ang insidente habang patungo ang grupo ng mga estudyante sa bayan ng Virac. Planado sanang ihatid sila upang makabalik sa klase kinabukasan. Ngunit bago pa sila makarating, biglang nagkaproblema ang preno ng trak.

“Pagdating doon sa Barangay Milaviga, bigla pong nawalan ng preno,” pahayag ni Delavin. “Pababa po ‘yun buti na lang hindi nahulog sa bangin. Tumagilid po ‘yung trak.”

Matapos ang aksidente, agad na rumisponde ang mga awtoridad at residente sa lugar. Ang mga sugatang estudyante ay dinala sa Caramoran Municipal Hospital para sa paunang gamutan. Anim sa kanila ang kinailangang isailalim sa CT scan dahil sa posibleng seryosong pinsala.

Hindi lamang mga estudyante ang nasaktan. Sugatan din ang drayber at pahinante ng trak at kasalukuyang nagpapagaling sa parehong ospital. Hanggang ngayon ay patuloy na minomonitor ang kanilang kondisyon.

Sa harap ng nangyari, muling nagpaalala ang Caramoran police na laging tiyakin ang maayos na kondisyon ng mga sasakyan bago bumiyahe, lalo na kapag may kargang mga estudyante o pasaherong kabataan. Ayon kay Capt. Delavin, simple ngunit regular na maintenance check ang makakapigil sa ganitong uri ng aksidente na maaaring humantong sa mas malalang trahedya.

Ang Caramoran ay isa sa mga bayan ng Catanduanes na madalas puntahan ng mga estudyante mula sa mga liblib na lugar patungo sa mas malalaking bayan gaya ng Virac para sa kanilang pag-aaral. Dahil dito, hindi na bago ang mga estudyanteng bumibiyahe gamit ang mga trak at malalaking sasakyan. Ngunit sa kabila nito, nananatiling hamon ang kaligtasan sa kalsada dahil sa mga matatarik na daan at matinding pababa sa lugar.

Hindi ito ang unang pagkakataon na nagkaroon ng malagim na aksidente sa kalsada na kinasasangkutan ng mga sasakyang nawalan ng kontrol. Nitong mga nakaraang buwan, isang nurse ang nasawi matapos sumemplang ang sinasakyan niyang motorsiklo at magulungan ng trak habang pauwi na mula sa trabaho. Ayon sa ulat, hindi na nagawang mailigtas ang biktima matapos magulungan ng mabigat na sasakyan,

Sa isa pang insidente, isang trahedya ang naganap sa Rodriguez, Rizal kung saan nagsalpukan ang dalawang trak at isang kolong-kolong. Isa ang kumpirmadong namatay sa aksidente habang ilan pa ang sugatan. Patuloy na pinag-iingat ang mga motorista laban sa overspeeding at labis na karga sa mga sasakyan upang makaiwas sa kapahamakan.

Source: KAMI.com.gh