Mayor Jerry P. Treñas, naglabas ng pahayag kaugnay sa negative review sa isang coffee shop

- Ipinagtanggol ni Iloilo City Mayor Jerry Treñas ang CoffeeBreak laban sa viral review ni Euleen Castro

- Nanawagan si Mayor Treñas sa publiko na huwag nang i-repost ang video na naglalaman ng mapanirang pahayag

- Binatikos ng netizens, lalo na ng mga Ilonggo, si Euleen at may mga panawagang ideklarang persona non grata siya

- Wala pang inilalabas na pahayag ang kampo ni Euleen ukol sa isyu, at nananatili pa rin online ang kontrobersyal na video

Mainit ang naging pagtanggap ng publiko sa kontrobersyal na food review ni content creator na si Euleen Castro, kilala bilang “Pambansang Yobab,” matapos niyang batikusin ang isang branch ng CoffeeBreak Cafe International Inc. sa Iloilo City.

Sa kanyang viral TikTok video, sinabi ni Euleen: “Andami. Out of all of you, all of you [mga inorder na food] walang masarap. Even the drinks. Even the lasagna. Lahat tab-ang... Ang dami n'yo diyan, walang masarap sa inyo? Ni isa? Puta.”

Dahil dito, mabilis na naglabas ng pahayag ang pamunuan ng CoffeeBreak na bagama't bukas sa mga kritisismo, iginiit nilang hindi katanggap-tanggap ang “strong and explicit language” na ginamit ni Euleen sa kanyang video. Ayon sa kanila, “constructive criticism” ay mahalaga, pero maaari itong ibigay sa maayos at respetadong paraan. Ipinagmalaki rin ng cafe ang kanilang 20 taong serbisyo sa coffee lovers ng Iloilo.

Ang kontrobersiya ay umabot hanggang sa lokal na pamahalaan nang mismong si Iloilo City Mayor Jerry P. Treñas ay maglabas ng pahayag ukol sa isyu. Sa kanyang Facebook page, hinimok niya ang mga Ilonggo na huwag nang i-share o i-repost ang video. “Content that spreads negativity or uses hurtful language does not represent who we are as a people,” aniya. Idinagdag din niya na dapat tayong maging responsable sa social media.

Nagpakita pa ng suporta ang alkalde sa coffee shop sa pamamagitan ng pagbisita rito kasama ang anak na si Paolo at si Iloilo Governor Toto Defensor. “A good coffee and breakfast with my son, Paolo and Governor Toto Defensor at Coffee Break,” saad sa caption ng kanyang post. Para sa ilan, malinaw itong indikasyon ng pagbibigay ng suporta sa local business na nadamay sa online drama.

Samantala, nananatiling tahimik ang kampo ni Euleen tungkol sa isyu. Hindi pa rin tinatanggal ang orihinal na video sa kanyang TikTok page, at wala pang inilalabas na opisyal na pahayag mula sa kanyang panig. Sa kabila nito, patuloy pa rin ang init ng usapin online, kung saan hati ang opinyon ng mga netizens—mayroong sumusuporta sa kalayaan ng opinyon, at mayroon ding dumedepensa sa reputasyon ng CoffeeBreak at sa mga Ilonggo.

Si Euleen Castro ay isang content creator na kilala sa kanyang pagiging prangka, direkta, at walang takot sa pagbibigay ng opinyon online. Mas kilala bilang “Pambansang Yobab,” siya ay isa sa mga personalidad sa social media na may malaking following dahil sa kanyang relatable na humor at fearless na content. Bukod sa kanyang mga food reviews, kabilang din siya sa mga host ng online show na CoffeeBreak.

Sa isang viral clip biglang nasira ang sofa habang nakaupo si Euleen. Sa halip na maasiwa, natural siyang bumitaw ng biro, na agad namang kinaaliwan ng viewers. Ang kanyang nakakatawang reaksyon ay naging patunay sa kanyang sense of humor at pagiging chill kahit sa mga awkward na sitwasyon.

Nag-viral kamakailan ang TikTok review ni Euleen tungkol sa pagkain sa CoffeeBreak, na tinawag niyang "lahat tab-ang." Sinagot naman ito ng pamunuan ng CoffeeBreak sa mahinahong pahayag na kinondena ang paggamit ng di-magagandang pananalita. Nanindigan sila sa kalidad ng kanilang serbisyo at nanawagang magpahayag ng opinyon nang may respeto.

Source: KAMI.com.gh