Isang benepisyaryo ng ayuda sa Cebu, pumanaw habang naghihintay ng validation

• Isang 31-anyos na ina ang pumanaw matapos mawalan ng malay habang nakapila para sa validation ng cash assistance sa Mandaue City noong Marso 11
• Kinilala ang biktima na si Mary Christ Cuizon na nagtungo sa Brgy. Opao gymnasium para ayusin ang tulong pinansyal para sa pinsalang dulot ng Bagyong Tino
• Nanawagan ang pamilya ni Cuizon na suriin ang CCTV footage dahil sa alegasyong inabot ng halos 30 minuto bago ito nabigyan ng sapat na medikal na atensyon
• Nagpaabot na ng pakikiramay at burial assistance ang DSWD at lokal na pamahalaan habang patuloy ang imbestigasyon sa posibleng pagkukulang ng mga tauhan sa venue

Sakit at panghihinayang ang nararamdaman ngayon ng pamilya ng isang batang ina sa Mandaue City matapos itong bawian ng buhay sa gitna ng pag-aasam na makakuha ng tulong pinansyal mula sa gobyerno.

Noong nakaraang Miyerkules, Marso 11, 2026, maagang gumising si Mary Christ Cuizon, 31, mula sa Barangay Paknaan para pumunta sa gymnasium ng Barangay Opao. Layunin niyang iproseso ang validation para sa Department of Social Welfare and Development (DSWD) financial assistance na nakalaan para sa mga biktima ng Bagyong Tino. Bilang isa sa mga nakalista, personal siyang nagtungo sa venue para makuha ang P5,000 na tulong para sa kanilang bahay na bahagyang nasira ng bagyo.

Read also

Hustisya ang sigaw para sa mag-asawang natagpuan sa magkahiwalay na lugar sa Nueva Ecija

Ngunit sa gitna ng paghihintay, bigla na lamang bumagsak at nawalan ng malay si Mary Christ. Ayon sa kanyang ama na si Jenniffer Cuizon, masakit para sa kanila ang nangyari lalo na’t may mga ulat na hindi agad natulungan ang kanyang anak. Sinabi ng ama na base sa impormasyong nakarating sa kanila, tila inabot pa ng 30 minuto bago ito naisugod sa ospital.

“Dili gyud lalim [mawad-an og anak]. Nangayawat intawn sa ayuda. Kinsa man gani nag-ingun nga personnel nga gipatol na, kung gipatol man gani nganong walay first aid?” pahayag ng ama sa panayam ng media.

Dagdag pa ng pamilya, anim na buwan pa lamang ang nakalilipas mula nang manganak si Mary Christ sa kanyang bunso at kasalukuyan pa itong nagpapalakas. Bagama’t nakararanas ng paminsan-minsang panghihina, tiniyak daw ng biktima sa kanila na maayos ang kanyang pakiramdam bago umalis ng bahay nang araw na iyon.

Sa kasalukuyan, nananawagan ang pamilya sa mga opisyal na ipakita ang CCTV footage mula sa gymnasium. Nais nilang malaman kung nagkaroon ba ng pagkukulang o delay sa pagresponde ng mga medical team sa lugar. Apat na maliliit na bata ang naulila ni Mary Christ, kung saan ang pinakamatanda ay 10 taong gulang at ang bunso ay sanggol pa lamang.

Agad namang nagpaabot ng pakikiramay ang DSWD at ang lokal na pamahalaan ng Mandaue. Nangako ang mga ito ng burial assistance at iba pang tulong pinansyal para sa naiwang pamilya. Sinimulan na rin ng City Legal Office ang imbestigasyon para matukoy kung sino ang dapat managot sa insidente.

Read also

Babae, sinaktan sa kalsada matapos hindi magbigay ng limos

Ang trahedyang ito ay muling nagbukas ng usapin tungkol sa seguridad at sistema ng pamamahagi ng ayuda sa bansa, lalo na para sa mga itinuturing na "vulnerable" na sektor.

Bukod sa insidenteng ito sa Mandaue, may mga nauna na ring ulat ang Kami.com.ph tungkol sa mga hamon at kontrobersya sa pamamahagi ng tulong mula sa DSWD sa iba't ibang panig ng bansa.

Sa Iloilo, iniutos ng DSWD ang isang malalimang imbestigasyon matapos ireklamo ng mga residente ang ilang opisyal ng barangay na umano'y kumuha ng malaking bahagi ng cash aid. Ang hakbang na ito ay bunsod ng mga ulat na hindi nakarating sa mga tamang benepisyaryo ang pondo.

Samantala, isang nakakaantig na kwento naman ang ibinahagi tungkol sa mabilis na pag-aksyon ng DSWD para tulungan ang isang ina na iniwan ang kanyang isang taong gulang na anak sa gitna ng kalsada dahil sa labis na kahirapan. Ang ahensya ay agad na nakialam upang masiguro ang kaligtasan ng bata at mabigyan ng kaukulang suporta ang pamilya.

Source: KAMI.com.gh