Jenny Garcia, kilalang ‘Sampaguita girl,’ muling nasilayan habang naglalako sa Ortigas

• Muling namataan si Jenny Garcia, ang viral na “Sampaguita girl,” habang naglalako ng bulaklak sa Ortigas
• Sa halip na high school uniform, suot na ngayon ni Jenny ang tila kanyang college attire
• Kinuwestiyon ng netizens kung bakit siya muling nagbebenta sa kalsada kahit nakatanggap na raw ng tulong noon
• Ibinunyag ng kanyang ina na ginagamit lang ni Jenny ang lumang uniporme para mas maraming bumili sa kanya

Muling nakita ang viral na “Sampaguita girl” na si Jenny Garcia habang nagbebenta ng bulaklak sa kahabaan ng Ortigas, malapit sa BSA Twin Towers — ang lugar kung saan una siyang nakilala ng publiko.

Isang Reddit user na may pangalang AlbieLovingYou ang nagbahagi ng larawan ni Jenny, na agad namang umani ng samu’t saring reaksyon mula sa online community.

Kapansin-pansing hindi na naka-high school uniform si Jenny sa pagkakataong ito. Sa halip, nakasuot siya ng tila college uniform, na nagpapakita ng pagbabagong imahe habang patuloy pa ring namumuhay bilang isang street vendor.

Maraming netizens ang muling nagtanong kung bakit bumalik sa kalsada si Jenny, lalo’t napaulat na nakatanggap siya ng suporta mula sa ilang social media personalities at mula mismo sa Department of Social Welfare and Development (DSWD).

Sa kabila ng viral fame at tulong na natanggap, nanatiling palaisipan kung bakit patuloy pa rin siyang namamasukan sa kalye. Sa isa pang Facebook post, isiniwalat ng ina ni Jenny na ang high school uniform na suot ng kanyang anak noon ay pag-aari niya mismo, at ginagamit ito ni Jenny upang magmukhang mas bata — isang estratehiyang nakatulong para mas dumami ang bumibili ng sampaguita sa kanya.

Si Jenny Garcia ay isang 22-anyos na college freshman na kumukuha ng kursong Medical Technology. Kahit sa murang edad ay sanay na siya sa pagsusumikap para sa kanyang pang-araw-araw na gastusin, kabilang ang pamasahe, tuition, at pagkain. Una siyang sumikat matapos mag-viral ang isang video kung saan pinapaalis siya ng isang mall security guard sa labas ng isang mall. Ang insidente ay nagresulta pa sa pagkakasibak ng naturang guwardiya sa trabaho, na lalo pang nagpasiklab ng interes ng publiko sa kanya.

Si Jenny Garcia, na mas kilala bilang “Sampaguita girl,” ay unang nakilala sa social media matapos kumalat ang video ng kanyang pagtatalo sa isang security guard sa labas ng mall. Mula noon, naging simbolo siya ng mga kabataang nagsusumikap para sa edukasyon at kabuhayan sa gitna ng kahirapan. Sa kabila ng tulong na natanggap niya, pinili pa rin niyang bumalik sa pagbebenta ng bulaklak — isang hakbang na patuloy na humahati sa opinyon ng netizens.

Ayon sa ulat ng Kami.com.ph, may posibilidad pang makabalik sa serbisyo ang sekyu na nasangkot sa viral na insidente kasama si Jenny Garcia. Napag-alamang nagsampa ng apela ang security guard upang muling mapag-aralan ang kanyang kaso. Hindi pa tiyak ang resulta, ngunit may mga nagpahayag ng suporta para sa kanyang pagbabalik.

Sa hiwalay na artikulo, ibinahagi ng Kami.com.ph na ang nasabing sekyu ay humingi na raw ng paumanhin kay Jenny Garcia. Sa kabila ng naging tensyon, tila nais niyang ayusin ang sitwasyon at muling magsimula. Hindi pa malinaw kung nagkaroon na sila ng personal na pag-uusap.

Source: KAMI.com.gh