Vic Sotto sa 'low quality' cp ni Vico: "Ibang klase yung anak kong yun, e"

• Viral ang video ni Mayor Vico Sotto sa TikTok dahil sa “low quality” na kuha, na inihalintulad ng netizens sa CCTV
• Ayon sa ama niyang si Vic Sotto, hindi nagpapalit ng cellphone si Vico hangga’t hindi pa ito sumasabog
• Tinawanan ng publiko ang ka-praktikal ni Vico, ngunit pinuri rin siya dahil hindi siya maluho sa personal na gamit
• Proud na proud si Vic Sotto sa kanyang anak at inilarawan niya ito bilang taong may paninindigan sa mga prinsipyo nito

Mula sa mala-CCTV na video hanggang sa mga biro ng netizens, muling nag-viral si Pasig City Mayor Vico Sotto—ngunit hindi dahil sa pulitika, kundi dahil sa kanyang cellphone.

Kamakailan lang, nag-upload si Mayor Vico ng isang TikTok video kung saan ipinaliwanag niya ang programang door-to-door delivery ng Noche Buena packs sa Pasig. Pero imbes na sa kanyang mensahe mapunta ang atensyon, naging usap-usapan ang "low quality" na kuha ng video.

“Gamit na gamit ang CCTV sa city hall ng Pasig ah,” at “Mayor ba’t naman sa CCTV ng munisipyo ka nag video?”—ito ang ilan sa mga biro ng netizens. Tinanggap naman ito ni Vico nang may halong biro: “Dami ko magandang sinabi, pinagtatawanan niyo phone ko!”

Sa ulat ng Phil News, nang tanungin si Vic Sotto tungkol sa viral na video ng anak niya, tumawa lang ito at sinabi:

“Alam mo, ibang klase yung anak kong yun, e. Ang sabi niya, hangga’t hindi sumasabog yung telepono niya, hindi magpapalit yun, e. Ganun ang prinsipyo nun, ganun manindigan yun, e. But I’m very, very proud of him.”

Ayon kay Bossing, hindi issue kung luma ang phone ng anak basta maayos itong gumagana. Dagdag pa niya, hindi rin ito bago sa kanya dahil kilala na niya ang anak bilang isang taong praktikal, simple, at hindi maluho sa personal na gamit.

Matatandaan na noong Abril, nag-post rin si Mayor Vico ng selfie mula sa isang campaign event. Muli, tinuya siya ng mga netizen sa camera quality ng kanyang phone. May mga nagbiro pa nga na aabutan siya ng bagong cellphone na hulugan, may discount pa.

Si Vico Sotto ay anak nina Vic Sotto at aktres na si Coney Reyes. Kilala siya bilang isa sa mga pinakabatang mayor sa bansa at kasalukuyang nasa kanyang ikatlong termino bilang Mayor ng Pasig City. Kilala si Vico sa kanyang transparency, people-centered governance, at pagiging simple at hindi showbiz sa pamumuhay. Kahit mula sa isang kilalang showbiz family, pinili niya ang tahimik ngunit epektibong serbisyo sa gobyerno.

Catriona Gray, nagsalita tungkol sa rumors na na-link siya kay Vico Sotto ∣ Pinabulaanan ni Miss Universe 2018 Catriona Gray ang kumalat na tsismis na romantikong na-link siya kay Mayor Vico Sotto. Ayon kay Catriona, hindi sila magkakilala nang personal at hindi totoo ang mga kumalat na haka-haka.

Mayor Vico, hindi raw aware sa issue ng pagli-link sa kanya kay Catriona Gray ∣ Sa hiwalay na panayam, sinabi ni Vico na hindi niya alam ang tungkol sa isyu at abala siya sa trabaho sa Pasig. Giit niya, wala siyang oras para sa personal na tsismis at mas gusto niyang tutukan ang kanyang serbisyo publiko.

Sa huli, pinatunayang muli ni Vico na hindi kailangan ng mamahaling gadgets para maging epektibong public servant. Sa paningin ng kanyang ama, ang ganitong paninindigan ay higit pa sa anumang high-end phone—at tunay ngang “ibang klase ang anak kong ‘yun.”

Source: KAMI.com.gh