Vic Sotto, pursigidong ituloy ang kaso laban kay Darryl Yap: “Laban tayo”

- Not guilty ang plea ni Darryl Yap sa cyber libel case na isinampa ni Vic Sotto sa Muntinlupa Regional Trial Court

- Kaugnay ito ng teaser ng pelikulang “The R4pists of Pepsi Paloma” kung saan malinaw na binanggit ang pangalan ng beteranong aktor

- Ayon sa abogado ni Vic, desidido ang kampo ng aktor na ituloy ang kaso hanggang sa korte at hindi interesado sa settlement

- Inaasahang magsisimula ang pre-trial at mandatory mediation sa mga susunod na buwan bago ang unang hearing sa Agosto 19, 2025

Humarap sa korte ang kontrobersyal na direktor na si Darryl Yap noong Hunyo 3, 2025, sa Muntinlupa Regional Trial Court para sa kanyang arraignment kaugnay ng dalawang kaso ng cyber libel na isinampa ng batikang aktor at TV host na si Vic Sotto.

Ang kaso ay nag-ugat sa teaser ng pelikula ni Yap na may pamagat na “The R4pists of Pepsi Paloma,” na umani ng matinding batikos online matapos tahasang banggitin ang pangalan ni Vic Sotto sa trailer.

Sa naturang arraignment, kinumpirma ng legal counsel ni Yap na si Atty. Raymond Fortun na nag-plead ng not guilty ang direktor. Ani Fortun, naging maayos at karaniwan ang takbo ng proceedings, at susundan ito ng pre-trial kung saan pagtatagpuin ang magkabilang panig upang pag-usapan ang mga facts at ebidensya ng kaso.

Samantala, iginiit naman ng abogado ni Sotto na si Atty. Enrique Dela Cruz na malinaw ang direktiba ng kanyang kliyente: "Laban tayo." Ayon pa kay Dela Cruz, may sapat na ebidensyang hawak ang kanilang kampo upang ituloy ang kaso hanggang sa dulo.

Noong Enero, naghain si Sotto ng reklamo sa Muntinlupa Prosecutor’s Office para sa 19 na bilang ng cyber libel laban kay Yap.

Sa kasalukuyan, itinakda na ang unang hearing sa Agosto 19, 2025, ngunit bago ito ay magkakaroon muna ng mandatory mediation conference upang pag-usapan kung may posibilidad ng pag-areglo—isang bagay na hindi prayoridad ng kampo ni Vic Sotto ayon sa mga pahayag.

Si Darryl Yap ay isang kilalang filmmaker na madalas nauugnay sa mga isyung politikal at panlipunan dahil sa kanyang kontrobersyal at mapangahas na estilo ng paggawa ng pelikula. Nakilala siya sa mga proyektong tulad ng Maid in Malacañang at Martyr or Murderer, at malapit siyang iniuugnay sa kampo ng mga Duterte. Dahil dito, madalas siyang trending at laman ng mga usapan sa social media—mapa-papuri o mapanuring mga opinyon.

Naglabas si Darryl Yap ng isang mainit at personal na birthday greeting para kay dating Pangulong Duterte sa pamamagitan ng social media. Tinawag niya itong "Ama ng Modernong Liderato" at sinamahan pa ng throwback photo kasama ang dating pangulo. Ang post ay agad naging viral, na may halong suporta at kritisismo mula sa publiko. Ipinakita nito ang matatag na ugnayan ni Yap sa pamilya Duterte na siyang nagbibigay sa kanya ng inspirasyon sa ilang mga proyekto.

Usap-usapan ang posibleng pagbabalik ng aktres na si Claudine Barretto sa pelikula bilang Inday Sara Duterte, sa isa sa mga susunod na proyekto ni Darryl Yap. Ayon sa ulat, nasa stage pa lamang ng pag-uusap ang proyekto ngunit tila bukas ang aktres sa ideya. Bagama’t wala pang pormal na pahayag mula sa kampo ni Inday Sara, naging mainit agad ang reaksyon ng publiko. Kung matutuloy, ito na naman ang isa sa mga pelikulang tiyak na pagmumulan ng diskurso sa social media.

Source: KAMI.com.gh