Lovella Orbe Maguad, binahagi ang kanyang emosyonal na reaksyon sa casting ni Criza

-Naungkat ng scriptwriter ang lumang post ni Gwynn tungkol kay Criza Taa, isang buwan bago ang kanyang pagkamatay

-Si Criza ang napiling gumanap bilang Gwynn sa MMK episode tungkol sa Maguad siblings

-Ayon sa post ni Lovella Maguad, ang coincidence ay nagdulot ng "goosebumps" sa production team

-Tila isang paalala at mensahe si Gwynn bago ang kanyang trahedya, ayon sa kanyang mga magulang

Nakakakilabot at tila sinadyang pagkakatugma—iyan ang damdamin ng pamilya Maguad matapos matuklasan ang lumang Facebook post ni Crizzle Gwynn Maguad tungkol sa aktres na si Criza Taa, eksaktong isang buwan bago ang trahedya na ikinasawi niya at ng kanyang kapatid na si Boyboy.

Ang post ay muling nadiskubre ng story writer ng Maalaala Mo Kaya habang ginagawa ang episode tungkol sa Maguad siblings. Sa hindi inaasahang pag-ikot ng pagkakataon, si Criza rin ang napiling gumanap bilang si Gwynn sa nasabing palabas.

Isinulat ng inang si Lovella Orbe Maguad ang kanyang matinding emosyon sa isang Facebook post:

“Only hours ago, our story writer stumbled upon a screenshot of Gwynn’s post about Criza—shared exactly a month before the brutal killing.

And guess what? Criza is playing Gwynn in the story.

This gave the production team goosebumps.”

Dagdag pa ni Lovella, “Gwynn is Lola's girl, too... Maraming Salamat for all your love to Gwynn n Boyboy. 💔🥲 That Dodz and I are forever grateful.” Sa dulo ng post, muling inalala ng ina ang kanyang pangungulila at pangakong ipagpapatuloy ang pagmamahal at pagbibigay-pugay sa alaala ng kanilang mga anak.

Sa MMK Mother's Day special, ipapalabas sa dalawang bahagi ang kwento ng magkapatid. Si Criza Taa ang gaganap bilang si Gwynn habang si Dimples Romana ang gaganap bilang ina nila. Ngunit ang tila “premonition” na post ni Gwynn tungkol kay Criza ay naging sentro ng atensyon, lalo na’t ilang linggo lamang bago ang krimen, ay pinuri at itinampok niya ang aktres sa kanyang Facebook account. Marami ang naniniwala na ito ay isang hindi maipaliwanag ngunit napakatinding koneksyon ng dalawang dalagita.

Noong Disyembre 2021, natagpuang wala nang buhay sina Crizzle Gwynn at Crizville Louis “Boyboy” Maguad sa loob ng kanilang tahanan sa M’lang, North Cotabato. Ang itinuturing nilang kapatid na kinupkop, si Janice (hindi tunay na pangalan), ay umaming isa siya sa mga nasa likod ng krimen. Ang motibo: matinding selos at galit. Hanggang ngayon, patuloy na hinihingi ng kanilang pamilya ang buong hustisya para sa dalawa.

Sa kabila ng paghahatol sa mga salarin, hindi pa rin matahimik sina Lovella at Cruz Maguad. Sa panayam, inilahad nilang tila hindi sapat ang sentensyang iginawad sa mga responsable, lalo’t patuloy pang naka-enroll sa pampublikong paaralan ang isa sa mga ito. Patuloy ang kanilang panawagan sa mas mabigat na hustisya at pagbibigay-halaga sa alaala ng kanilang mga anak.

Inilarawan ni Dimples Romana ang MMK episode bilang isa sa pinakamabigat sa kanyang karera. Aniya, hindi naging madali ang pagsasabuhay ng papel ng isang inang nawalan ng anak sa marahas na paraan. Inalay niya ang episode sa lahat ng magulang na nawalan ng anak, lalo na kina Lovella at Cruz Maguad na patuloy ang lakas ng loob sa kabila ng trahedya.

Source: KAMI.com.gh