Azenith Briones, nagsalita na tungkol sa balitang dinukot siya

- Nagsalita si Azenith Briones tungkol sa balitang dinukot siya ilang buwan na ang nakakaraan

- Ayon sa kanya, dinala siya ng kanyang mga anak sa rehabilitation center dahil inakala nilang nalulong siya sa sugal

- Nilinaw ni Azenith na hindi siya nalulong at hindi siya dinukot kundi desisyon ng kanyang pamilya

- Ibinahagi ng kanyang mga anak na mas naging maayos ang kanilang relasyon matapos ang masinsinang pag-uusap sa rehab

Sa kauna-unahang pagkakataon, nagsalita ang dating aktres na si Azenith Briones tungkol sa mga kumakalat na balita ukol sa umano’y pagkawala niya ilang buwan na ang nakalipas. Sa isang eksklusibong panayam ni Julius Babao, nilinaw ni Azenith na hindi siya dinukot, kundi kusa siyang dinala ng kanyang mga anak sa isang rehabilitation center.

Ito ay matapos silang maniwalang nalulong siya sa sugal, bagay na pinabulaanan naman ng aktres.

Read also

John Estrada, itinangging habulin siya ng mga babae: "Hindi talaga"

Ikinuwento ni Azenith na ang kanyang mga anak ang nagpasya na dalhin siya sa rehab matapos ang mga alalahanin tungkol sa kanyang kalusugan at kalagayan. Kinumpirma niya rin ang balitang kinuha siya mula sa kanyang tahanan sa BF Homes, Parañaque City.

Ayon sa aktres, bagama’t hindi siya sumasang-ayon sa desisyon ng kanyang mga anak noong una, naiintindihan niya ang kanilang ginawa dahil gusto lamang nilang protektahan siya.

Samantala, ayon sa mga anak ni Azenith, dumaan ang kanilang pamilya sa isang mabigat na pagsubok, at hindi nila alam kung paano kausapin ang kanilang ina sa gitna ng mga nangyayari.

Ibinahagi nila na sa kabila ng sitwasyon, hindi nila pinabayaan ang kanilang ina at ang kanilang desisyon ay batay sa pagmamahal at pag-aalala.

Sa ngayon, mas naging maayos na ang samahan ni Azenith at ng kanyang mga anak. Ipinahayag ng aktres na matapos ang masinsinang pag-uusap sa loob ng rehab, naging mas malalim at masaya ang kanilang ugnayan bilang pamilya.

Read also

AJ Raval, ibinida ang sweet pictures nila ni Aljur Abrenica

Si Azenith Briones ay isang modelo at beauty queen na naging Mutya ng Pilipinas Miss Photogenic at 2nd runner-up. Dahil sa kanyang kapansin-pansing ganda at alindog, pumasok din siya sa telebisyon at pelikula. Ang kanyang mga pelikula ay labis na inaabangan ng kanyang mga tagahanga, lalo na nang maging bahagi siya ng kontrobersyal na pelikulang "Temptation Island" noong 1979. Hindi nagtagal, nagpasya siyang iwan ang showbiz at magpursige ng pribadong buhay kasama ang kanyang asawa at pamilya. Sa kasalukuyan, siya ay isang haciendera, may-ari ng farm at negosyo sa Laguna. Siya rin ay isang masigasig na environmentalist at inspirasyon sa kanyang mga anak at mga kaibigan.

Matatandaang naging daan ang YouTube channel ni Julius Babao upang makita ng publiko ang kalagayan ng ilang mga dating sikat na artista na kinabilang nina Deborah Sun, Coritha, Dinky Doo at marami pang iba.

Source: KAMI.com.gh