10-anyos, nagpaka-‘human shield' para iligtas ang kaklase sa school shooting

• Isang 10-anyos na batang si Victor ang nagpaka-‘human shield' upang protektahan ang kaklase niyang si Weston Halsne sa mass shooting sa Annunciation Catholic School sa Minneapolis
• Habang nakahandusay at hinarangan ng kanyang katawan ang kaibigan, tinamaan si Victor ng bala, ngunit nakaligtas si Weston na nagtamo lamang ng fragment sa leeg
• Nadiskubre ng mga doktor na muntik nang tamaan ang carotid artery ni Weston, at itinuring nilang milagro ang kanyang survival
• Dalawang bata ang nasawi at 17 ang sugatan sa insidente, kabilang ang mga estudyante at teacher, habang natagpuang patay rin ang suspek matapos barilin ang sarili

Sa isang nakagigimbal na pamamaril sa Annunciation Catholic School sa Minneapolis, Minnesota, isang kwento ng kabayanihan ng isang 10-anyos na estudyante ang umangat sa gitna ng trahedya. Nakilala ang batang si Victor na nag-alay ng kanyang katawan upang iligtas ang kaklase niyang si Weston Halsne, na ngayon ay nakaligtas matapos ang milagrosong pagkakataon.

Read also

Househelp sa Jaro District, Iloilo City, kinasuhan ng qualified theft matapos tangayin ang P118K

“He saved me” – salaysay ng batang survivor

Ayon sa kwento ni Weston, ikalimang baitang na estudyante sa naturang paaralan, agad siyang tumakbo at nagkubli sa ilalim ng isang pew habang bumubulusok ang bala sa loob ng simbahan. Ngunit hindi doon nagtapos ang kanyang kaligtasan. Dumapa si Victor sa ibabaw niya, nagsilbing kalasag mula sa paputok ng 23-anyos na suspek.

“My friend Victor like, saved me though. Because he laid on top of me. But he got hit. I was super scared for him,” ani Weston sa panayam na naiulat ng Yahoo News.

Bagama’t nabuhay siya, hindi lingid kay Weston ang takot at trauma na iniwan ng pangyayari. “I think I got, like, gunpowder on my neck,” dagdag pa niya.

Ngunit nang sumailalim siya sa pagsusuri, nadiskubre ng mga doktor na hindi lamang pulbura ang tumama sa kanyang leeg kundi fragment ng bala. Ayon kay Grant Halsne, ama ni Weston, muntik nang tamaan ang carotid artery ng bata.

Read also

Dump truck sumalpok sa bahay, lola patay habang inaayos ang tindahan sa Laguna

“If it [the bullet fragment] went any further, he would’ve died,” pahayag ni Grant.

Sa kabutihang palad, low-risk ang operasyon para alisin ang fragment at inaasahang ganap na makakarekober si Weston. Gayunman, nananatili ang trauma dahil sa karanasan—takot siya ngayon sa malalakas na tunog at ayaw mag-isa.

Nangyari ang pamamaril bago mag-alas-8:30 ng umaga habang nagsasagawa ng misa sa simbahan ng paaralan. Ayon sa awtoridad, pinaputukan ng suspek ang mga estudyante at teacher mula sa stained-glass windows, dahilan upang masawi ang dalawang bata at magtamo ng sugat ang 17 iba pa.

Matapos ang ilang minutong kaguluhan, natagpuan ng mga pulis ang suspek na wala nang buhay—nagbaril umano sa sarili matapos ang ginawang karahasan. Tatlong armas ang narekober sa pinangyarihan: isang rifle, isang shotgun, at isang pistol.

Sa paunang imbestigasyon, lumalabas na “popularidad” ang dahilan ng suspek. Nais daw nitong makilala, at nag-iwan pa ng sulat na nagsasabing gusto niyang makita ang mga bata na naghihirap.

Read also

32-anyos na babae, natagpuan ang ina na nawalay sa kanya ng 30 taon dahil sa isang livestream

Sa loob ng maraming taon, paulit-ulit na naging headline sa Amerika ang school mass shootings. Nagdulot ito ng matinding panawagan para sa mas mahigpit na gun control laws, ngunit nananatiling hamon ang balanse ng karapatan sa armas at seguridad ng kabataan. Sa kasong ito, muling lumutang ang tanong: hanggang kailan matututo ang lipunan mula sa ganitong trahedya?

Sa naunang ulat ng Kami.com.ph, iniulat ang nasabing pamamaril na nag-iwan ng dalawang bata na patay at 17 sugatan. Ang malagim na pangyayari ay nagdulot ng pagdadalamhati sa buong komunidad, kasabay ng mas pinaigting na imbestigasyon ng mga awtoridad.

Samantala, kamakailan lamang, iniulat din ang isa pang karumal-dumal na school shooting nang pagbabarilin ng isang dating estudyante ang kanyang dating paaralan na nagresulta sa pagkamatay ng 10 katao. Nagpaigting ito ng takot at pangamba sa mga paaralan sa U.S., habang patuloy ang debate hinggil sa kontrol ng baril.

Source: KAMI.com.gh