Mukbang creator Ganfan Yingying, 24, pumanaw ilang araw matapos ang huling video
- Pumanaw sa edad na 24 ang Chinese content creator na si Chen Ziyi, na mas kilala online bilang Ganfan Yingying, ayon sa obituary na inilabas ng kaniyang mga magulang noong Setyembre 4
- Tatlong araw bago ang kaniyang pagpanaw, nagbahagi siya ng huling video mula sa ospital kung saan ipinaliwanag niyang bumagal ang kaniyang uploads at livestreams dahil sa kaniyang kalagayan
- Hindi tinukoy ng kaniyang pamilya ang sanhi ng pagkamatay, habang iniulat naman ng Chinese media na maaaring may kaugnayan sa matagal na mababang potassium ang kaniyang kondisyon, bagay na hindi pa opisyal na nakukumpirma
- Muling napag-usapan matapos ang kaniyang pagpanaw ang epekto ng extreme eating content sa mga creator, kabilang ang mga panganib na maaaring kaakibat ng ilang gawain na ginagawa upang mapanatili ang kanilang content
MAKI-TINGIN KA NAMAN: Pwede ka nang mag-comment sa mga artikulo ng KAMI! Subukan mo, madali lang!
Pumanaw na sa edad na 24 ang Chinese content creator na si Chen Ziyi, na mas kilala online bilang Ganfan Yingying at nakilala dahil sa kaniyang mga mukbang video.
Source: Facebook
Ayon sa obituary na inilabas ng kaniyang mga magulang noong Setyembre 4, Agosto 17 pumanaw si Chen. Nakasaad din sa notice na ipinanganak siya noong Marso 24, 2002, ngunit walang binanggit na sanhi ng kaniyang pagkamatay.
Iniulat naman ng Chinese media ang kaniyang pagpanaw makalipas ang ilang araw.
Bago nito, nagbahagi si Ganfan Yingying ng isang video noong Agosto 14 na kuha mula sa ospital. Sa naturang video, ipinaliwanag niya sa kaniyang followers kung bakit nabawasan ang kaniyang uploads at livestreams.
Like and share our Facebook posts to support the KAMI team! Share your thoughts in the comments. We love reading them!
Ayon sa creator, bumaba ang kaniyang potassium dahil sa kaniyang ginagawa para sa mukbang content at kinailangan niyang ma-confine.
“Although making money is important, health should always come first,” ani niya sa video, ayon sa Global Times.
Ibinahagi rin niya na umabot sa 2.3 millimoles per liter ang kaniyang blood potassium. Ayon sa mga ulat, itinuturing na mababa ang potassium kapag nasa ibaba ito ng 3.5 millimoles per liter.
Hindi naman sinabi ng kaniyang pamilya na ang mababang potassium ang naging sanhi ng kaniyang pagkamatay.
May ilang Chinese outlets na nag-ulat, batay sa kanilang mga source, na posibleng nagkaroon ng kaugnayan ang matagal na mababang potassium sa cardiac arrest. Gayunman, hindi ito opisyal na nakumpirma ng kaniyang pamilya o ng awtoridad.
Mahigit isang milyon ang followers ni Ganfan Yingying sa social media, at ilang ulat ang nagbanggit ng tinatayang 1.2 milyon.
Naging bahagi ng kaniyang online content ang mga video kung saan kumakain siya ng malalaking dami ng pagkain sa isang session. Kabilang sa mga pagkaing lumitaw sa kaniyang mga video ang seafood at preserved duck eggs.
Ang mukbang ay isang uri ng video o livestream kung saan kumakain ang creator habang nakikipag-usap o nakikipag-ugnayan sa kaniyang audience.
Nagsimula ang format sa South Korea at kalaunan ay kumalat sa iba pang bahagi ng Asia, kabilang ang Pilipinas, kung saan marami ring content creator ang gumagawa ng food challenges, food hauls at iba pang uri ng eating content.
Ang hypokalemia ay tawag sa kondisyon kung saan mababa ang potassium sa dugo. Mahalaga ang potassium sa normal na paggana ng katawan, kabilang ang regular na tibok ng puso.
Gayunman, binigyang-diin ng mga doktor na hindi simpleng pagkain ng maraming pagkain ang awtomatikong nagdudulot ng matinding pagbaba ng potassium.
Ayon kay Dr. Chai Qichen ng Zhejiang Hospital, na sinipi ng Global Times, maaaring magkaroon ng problema kapag may ilang creator na gumagamit ng mga paraan pagkatapos kumain upang maiwasan ang pagtaas ng timbang. Kabilang dito ang pagsusuka at paggamit ng laxatives, na maaaring magdulot ng pagkawala ng fluid at electrolytes.
Ayon sa mga ulat, sinabi rin umano ni Ganfan Yingying na may kaugnayan sa kaniyang mukbang work ang kaniyang kondisyon at may matagal na siyang ginagawa matapos ang filming na maaaring nakaapekto sa kaniyang kalusugan.
Naospital na rin umano siya nang higit sa isang pagkakataon dahil sa mababang potassium.
Dahil sa kaniyang pagpanaw, muling nabigyang-pansin sa China ang usapin tungkol sa extreme eating content at sa mga kondisyong maaaring harapin ng ilang creator para mapanatili ang kanilang audience.
Hindi naman nangangahulugan ang kaniyang kaso na ang mukbang mismo ang direktang sanhi ng kaniyang pagkamatay. Sa ngayon, nananatiling hindi opisyal ang eksaktong sanhi ng pagpanaw ni Chen.
Para sa mga gumagawa at nanonood ng ganitong content, muling naging bahagi ng diskusyon ang kahalagahan ng kalusugan, lalo na kapag may mga gawain na maaaring makaapekto sa pagkain, hydration at electrolyte balance ng katawan.
May mga naunang ulat din ang KAMI.com.ph tungkol sa mga content creator na nasangkot sa mga insidenteng may kaugnayan sa mukbang at eating challenges.
Noong Hunyo 2024, iniulat ng KAMI ang pagpanaw ng vlogger na si Dongz Apatan mula Iligan City matapos ang kaniyang huling mukbang content. Ayon sa ulat, gumawa siya ng video na tampok ang malaking serving ng pagkain bago siya isinugod sa ospital. Iniulat din noon na sinasabing nagkaroon siya ng kondisyon na nakaapekto sa kaniyang kalagayan, bagama't ang mga detalye ay batay sa ulat na inilabas ng Brigada News.
Noong Hunyo 2025 naman, iniulat ng KAMI ang kaso ng content creator na si Rogelio mula Kananga, Leyte, na namatay matapos tanggapin ang isang mukbang challenge mula sa kaniyang follower. Sa ulat, nagsagawa siya ng challenge noong Mayo 19 at kalaunan ay nakaranas ng problema sa kaniyang kalagayan.
Bagong feature: Tingnan ang mga balitang para sa'yo ➡️ hanapin ang "Recommended for you" block at mag-enjoy!
Source: KAMI.com.gh
