Higit 800 ang patay at 2,800 sugatan sa malakas na lindol sa Afghanistan

• Higit 800 ang namatay at 2,800 ang sugatan matapos ang magnitude 6 na lindol sa Afghanistan
• Tatlong baryo sa Kunar ang tuluyang nabura, habang libo ang nawalan ng tahanan
• Hirap ang mga rescuer dahil sa landslide at masamang panahon na nagdulot ng hindi madaanan na kalsada
• Kakulangan ng pondo at bawas na international aid dagdag hamon sa Taliban government

Isang malakas na lindol ang yumanig sa Afghanistan at kumitil ng higit 800 buhay, habang 2,800 naman ang sugatan, ayon sa mga otoridad nitong Lunes. Nahihirapan ang mga rescuer na marating ang ilang liblib na lugar dahil sa masungit na panahon at mapanganib na bundok na tinamaan ng landslide.

Ayon kay Sharafat Zaman, tagapagsalita ng Ministry of Health sa Kabul, desperado ang kanilang pangangailangan ng tulong mula sa international community. “We need it because here lots of people lost their lives and houses,” aniya sa panayam ng Reuters.

Sa tala ng gobyerno, karamihan sa mga namatay ay mula sa probinsya ng Kunar kung saan 610 ang naitalang patay, at 12 naman sa Nangarhar. Tumama ang magnitude 6 na lindol bandang hatinggabi, may lalim na 10 kilometro. Sa lakas ng yumanig, maraming mudbrick houses ang gumuho.

Read also

TikTok star at buo niyang pamilya, minasaker at iniwan sa isang abandonadong sasakyan

Ikinuwento ni Ziaul Haq Mohammadi, isang estudyante mula Jalalabad, na halos hindi siya makatayo nang umatake ang lindol. “We spent the whole night in fear and anxiety because at any moment another earthquake could happen,” dagdag niya.

Sa kabila ng sitwasyon, hirap ang rescue teams na makapasok sa mga baryo na nasa tabi ng Pakistani border. Bukod sa nawasak na kalsada, nagdulot din ng panganib ang malalakas na ulan nitong mga nakaraang araw. “The area of the earthquake was affected by heavy rain in the last 24-48 hours as well, so the risk of landslides and rock slides is also quite significant,” paliwanag ni Kate Carey mula sa United Nations Office for the Coordination of Humanitarian Affairs (UNOCHA).

Dagdag pa rito, kailangang mabilis na mailibing o matanggal ang mga bangkay ng hayop upang hindi makontamina ang tubig. Habang lumalalim ang operasyon, inaasahang tataas pa ang bilang ng mga nasawi.

Ayon kay health ministry spokesperson Abdul Maten Qanee, nakapokus ang kanilang buong puwersa sa pagbibigay ng tulong mula seguridad, pagkain, hanggang kalusugan. Nakunan ng Reuters TV ang ilang helicopter na naglilipat ng sugatan habang ang mga residente ay kusa ring tumutulong sa mga sundalo at medics.

Read also

Isang estudyante patay matapos makuryente sa Samal; LGU at NORDECO naglabas ng pahayag

Tatlong baryo ang tuluyang nabura sa Kunar. Ilang nakaligtas ang humihingi ng agarang tulong. “This is Mazar Dara in Nurgal district. The entire village has been destroyed,” ayon sa isang biktima. “Children and elders are trapped under the rubble. We need urgent help.”

Samantala, nanawagan din ang Afghanistan ng pandaigdigang suporta. Ilang bansa ang agad nagpaabot ng tulong gaya ng India na nagpadala ng 1,000 family tents at food supplies, habang nangakong tutulong rin ang China. Gayunpaman, hindi pa malinaw kung magkakaloob ng aktwal na suporta ang Estados Unidos.

Mula nang maupo ang Taliban noong 2021, sunod-sunod na kalamidad na ang tumama sa bansa. Nahinto rin ang malaking bahagi ng foreign aid dahil sa mga polisiya ng Taliban, partikular sa kababaihan. Mula $3.8 bilyon na tulong noong 2022, bumagsak ito sa $767 milyon ngayong taon.

Ang Afghanistan ay matagal nang kilala bilang earthquake-prone area, lalo na sa Hindu Kush region kung saan nagsasalubong ang Indian at Eurasian tectonic plates. Isa sa mga pinakamalubhang lindol ay noong 2022 kung saan higit 1,000 ang namatay. Sa kasalukuyan, doble ang dagok ng kalamidad sa bansa na patuloy ding nakikipaglaban sa kakulangan ng pondo at pandaigdigang suporta.

Read also

401 human skeletal remains, natagpuan sa Taal Lake kaugnay sa kaso ng missing sabungeros

Noon lamang nakaraang linggo, iniulat din ng Kami.com.ph ang pagkasawi ng isang beauty queen sa Myanmar matapos ang malakas na lindol doon. Ayon sa ulat, kabilang siya sa mga daan-daang namatay nang gumuho ang mga gusali at bahay dahil sa lakas ng pagyanig. Ang pagkamatay niya ay nagdulot ng labis na pagdadalamhati sa kanyang pamilya at mga tagahanga. Basahin dito

Samantala, nakumpirma rin ng Department of Foreign Affairs (DFA) ang pagkamatay ng isang gurong Pinoy na unang naiulat na nawawala matapos ang parehong lindol sa Myanmar. Lumabas sa imbestigasyon na hindi na siya nakaligtas sa gumuhong estruktura. Ang balitang ito ay nagdulot ng panibagong sakit sa puso ng mga Pilipino, lalo na’t maraming teachers ang nagtatrabaho abroad upang maitaguyod ang kanilang pamilya. Basahin dito

Ang magkakasunod na trahedyang ito, mula Myanmar hanggang Afghanistan, ay nagpapaalala kung gaano kahina ang mga bansang nasa gilid ng aktibong fault lines. Sa kabila ng mga hamon, nananatiling pag-asa ng mga biktima ang mabilis na tugon at tulong mula sa pandaigdigang komunidad.

Source: KAMI.com.gh