Litrato ng pamilya bago ang pagbagsak ng eroplano, umantig sa netizens

• Ang litrato ng pamilya ni Dr. Komi Vyas sa loob ng eroplano, naging huling alaala bago ang pagbagsak
• Ang mag-asawang doktor at kanilang tatlong anak ay patungong London para magsimulang muli
• Ang larawan ay kuha ni Dr. Prateek Joshi ilang minuto bago mangyari ang trahedya
• Umabot sa 242 ang sakay ng eroplano, iisa pa lamang ang nakaligtas

Isang larawan ang naging tahimik na saksi sa isang masayang simula na nauwi sa isang malagim na wakas. Ito ang selfie na kuha ng mag-asawang doktor na sina Dr. Prateek Joshi at Dr. Komi Vyas habang nasa loob ng Air India Flight 171—ang parehong flight na ilang minuto lang ang lumipas ay bumagsak sa Ahmedabad, India.

Sa larawan, masisilayan ang tuwa at pag-asa ng buong pamilya: magkatabi sina Dr. Joshi at Dr. Vyas na parehong nakangiti, habang sa kabilang bahagi ng aisle ay nakaupo ang kanilang anak na babae na si Miraya, 8, na masiglang naka-ngiti rin, kasama ang kambal na sina Nakul at Pradyut, 5, na pilit ding ngumiti para sa kamera.

Ang selfie ay isinama sa mga ulat ng media bilang isa sa mga pinakahuling alaala mula sa mga sakay ng eroplanong may sakay na 242 katao. Sila’y papunta sana sa London kung saan naninirahan na si Dr. Joshi, habang si Dr. Vyas ay kamakailan lamang nagbitiw sa trabaho sa Pacific Hospital sa Udaipur upang sumama sa kanyang asawa. Ang pagbagsak ng eroplanong Boeing 787-8 Dreamliner ay naganap 32 segundo matapos ang take-off—isang trahedya na ikinasawi ng halos lahat ng pasahero.

Ayon sa mga ulat ng NDTV, bumalik si Dr. Joshi sa kanilang bayan sa Banswara, Rajasthan, upang isama sa London ang kanyang pamilya. Maraming kaanak ang sumama upang ihatid sila sa Ahmedabad airport. "Komi had quit her job recently to join her husband in London," ayon sa tagapagsalita ng Pacific Hospital. Si Komi ay sampung taon nang kasal kay Prateek, ayon naman sa kanyang kapatid na si Prabuddha.

Mga eksperto sa aviation ang nagsabing mukhang hindi nakalikha ng sapat na thrust ang makina ng eroplano kaya’t hindi ito nakakuha ng sapat na lift. Ayon kay Captain Saurabh Bhatnagar, isang dating senior pilot, mukhang nawalan ng power ang makina ng eroplano, dahilan upang agad itong bumagsak. Sa kabila ng trahedya, isang pasahero lamang ang naiulat na nakaligtas: si Vishwash Kumar Ramesh, isang British-Indian na pabalik sa UK matapos bumisita sa India.

Nagpahayag ng pakikiramay si Prime Minister Narendra Modi at sinabing tinututukan ng gobyerno ang tulong sa mga naapektuhan. "The tragedy in Ahmedabad has stunned and saddened us. It is heartbreaking beyond words," ani ng punong ministro sa kanyang post sa X.

Si Dr. Komi Vyas ay isang respetadong doktor mula sa Udaipur na nagtrabaho sa Pacific Hospital. Isa siyang mapagmahal na ina na nagpasya na iwan pansamantala ang kanyang propesyon upang pagsamahin ang pamilya sa London. Ang kanyang asawa na si Dr. Prateek Joshi ay isa ring doktor at matagal nang naninirahan sa UK. Ang pamilya ay kilala sa kanilang pagiging simple at dedikado sa serbisyo sa kapwa.

Isang trahedyang panghimpapawid ang yumanig sa buong mundo matapos bumagsak ang isang Boeing 787 na patungong London. Ang insidente ay iniimbestigahan pa ngunit pinaniniwalaang may problema sa makina ang sanhi.

Nagpaabot ng pakikiramay si Pangulong Ferdinand Marcos Jr. sa mga biktima ng trahedya sa India. Tinawag niya itong isang nakapanlulumong pangyayari na dapat pagtuunan ng masusing imbestigasyon.

Source: KAMI.com.gh