BF, nanghablot ng cellphone para may pang-Valentine's date at gift sa kanyang GF

• Arestado ang isang lalaki sa umano'y panghahablot ng cellphone sa Bataan
• Ayon sa suspek, nagawa lamang niya ito upang mayroong panggastos para sa Araw ng mga Puso
• Nabawi naman ang cellphone na tinatayang may halagang higit Php5,000
• Desidido pa rin ang biktima na sampahan ng kaso ang sinasabing mandurukot

Arestado ng mga awtoridad ang isang 35-anyos na lalake matapos umanong manghablot ng cellphone ng isang babae sa Barangay Roosevelt, Dinalupihan, Bataan.

Sa ulat ni Roel Tarayao ng News5, lumabas sa paunang imbestigasyon na naganap ang insidente sa isang pampublikong lugar kung saan bigla umanong nilapitan ng suspek ang biktima at sapilitang inagaw ang cellphone nito bago nagtangkang tumakas.

Sa isinagawang pagtatanong, inamin ng lalaki ang krimen at ipinaliwanag na ang kanyang motibo ay ang kagustuhang makakuha ng pera upang magamit sa pakikipag-date sa kanyang nobya sa Araw ng mga Puso sa Pebrero 14. Balak niya sana umanong bilhan ito ng bulaklak gamit ang pera sakaling mabenta ang nakuhang cellphone.

Read also

Rochelle Pangilinan, may nilinaw tungkol sa pagiging guests ng BINI sa kanilang concert

Matagumpay na nabawi ng biktima ang kanyang cellphone na nagkakahalaga ng mahigit limang libong piso (₱5,000), subalit desidido pa rin umano itong sampahan ng kaso. Ayon sa biktima, ang personal na dahilan ng suspek ay hindi sapat upang bigyang-katwiran ang isang kriminal na gawain, lalo na kung ito ay nagdudulot ng panganib, takot, at trauma sa mga mamamayan.

Binigyang-diin naman ng mga awtoridad ang kahalagahan ng agarang pagtugon ng komunidad at ng mga opisyal ng barangay, na naging mahalagang salik sa mabilis na pagkakaaresto sa suspek. Patuloy pa ring isinasagawa ang masusing imbestigasyon upang matukoy kung may iba pa itong kaugnay na insidente sa lugar.

Halos isang taon na ang nakalilipas nang gumulantang sa publiko ang malagim na insidente ang yumanig sa katahimikan ng Laoag City sa bisperas ng Araw ng mga Puso matapos ang isang brutal na pananaksak na ikinasawi ng isang katao at ikinasugat ng dalawa pa, na nagdulot ng matinding takot at pangamba sa komunidad at nagbukas ng mas malalim na usapin hinggil sa karahasang domestiko; ayon sa ulat ng ABS-CBN News, sinisilip ng mga imbestigador ng pulisya ang selos na may kaugnayan sa dating relasyon bilang posibleng motibo sa likod ng marahas na pag-atake, habang patuloy ang imbestigasyon ng mga awtoridad upang matukoy ang buong katotohanan at mapanagot ang may sala, sa gitna ng panahong dapat sana’y puno ng pag-ibig ngunit nabalot ng lungkot at karahasan.

Read also

Sunog na bangkay ng isang babae natagpuan sa Quezon, Nueva Vizcaya

Samantala, naging agaw-atensyon din noon ang isang inmate sa Cebu na nagawang pakasalan ang kanyang nobya sa mismong Araw ng mga Puso. Sinasabing walang anumang hadlang sa kanilang pagmamahalan dahil sa kabila ng kanyang sitwasyon, nanindigan siyang pakasalan ang taong matiyaga siyang hinihintay sa labas ng piitan. 20 taon na ang kanilang relasyon. Sinasabing 15-anyos pa lamang sila nang umusbong ang kanilang pagtitinginan na kalauna'y sinubok din ng panahon. Gayunpaman, sa kabila ng napakaraming pangyayari, nauwi pa rin sa kasalan ang kanilang pagmamahal, patunay na sila nga talaga ang itinakda at nakatadhana para sa isa't isa.

Source: KAMI.com.gh