Viral ‘Imburnal Girl,’ aminadong may bisyo pero sinabihang magbago ni Boss Toyo

-Bumisita si Rosemarie Peligrino kay Boss Toyo para ibenta ang cutter blade na nahulog sa imburnal

- Binili ito ni Boss Toyo sa halagang ₱10,000 at binigyan din ng dalawang cellphone ang mga kasama ni Rosemarie

- Inamin ni Rosemarie na may bisyo siya pero hindi raw ito araw-araw

- Pinayuhan siya ni Boss Toyo na magbago upang hindi masayang ang ₱80,000 tulong mula sa DSWD

Matapos ang kanyang kontrobersyal at viral na pag-ahon mula sa imburnal sa Makati, bumisita si Rosemarie Peligrino—mas kilala ngayon bilang ang "Imburnal Girl"—kay kilalang online content creator at kolektor na si Boss Toyo. Layunin ng pagbisita niya ay ang ibenta ang cutter blade na naging dahilan ng kanyang pagbaba sa imburnal, isang bagay na para sa kanya ay may "historical value."

Ayon kay Rosemarie, aksidenteng nahulog ang cutter blade na ginagamit niya sa kanyang hanapbuhay bilang mangangalakal ng plastik at karton, kaya’t napilitan siyang bumaba sa imburnal upang kunin ito. Ibinibenta niya ito kay Boss Toyo sa halagang ₱5,000 ngunit dahil sa kabutihang-loob ni Boss Toyo at bilang suporta sa kanyang muling pagbangon, binili niya ito sa halagang ₱10,000. Bilang dagdag, binigyan din niya ng tig-isang cellphone ang dalawang kasama ni Rosemarie.

Nilagdaan pa ni Rosemarie ang cutter blade bilang patunay sa authenticity nito, at plano ni Boss Toyo na ilagay ito sa kanyang koleksyon ng mga memorabilia sa kanyang personal na “museo.” Sa isang bahagi ng video, tinanong din siya ni Boss Toyo tungkol sa pagkakaroon niya ng bisyo, kung saan inamin naman niya: “Nagbibisyo naman po, pero hindi naman po araw-araw eh.”

Bagaman hindi binanggit kung anong uri ng bisyo ang tinutukoy, pinaalalahanan siya ni Boss Toyo na magbago na habang maaga at huwag sayangin ang biyayang natanggap mula sa Department of Social Welfare and Development (DSWD). “Sayang naman ‘yung binigay sa ’yo,” ani Boss Toyo, sabay kuwento ng kanyang sariling karanasan bilang dating nalulong din sa bisyo.

Ang kabuuang tulong ng DSWD kay Rosemarie ay nasa halagang ₱80,000, na layuning magsilbing panimula ng maliit na negosyo gaya ng sari-sari store. Hiling ni Boss Toyo at ng marami sa online community na gamitin ito sa tamang paraan upang makabangon si Rosemarie at magsimulang muli.

Si Rosemarie Peligrino ay nag-viral matapos siyang makitang lumalabas mula sa isang imburnal sa Makati. Marami ang nag-akalang doon siya nakatira, ngunit nilinaw ni Rosemarie na aksidente lamang ang lahat at nais lamang niyang mabawi ang kanyang cutter blade. Sa kabila ng mga maling haka-haka, naging daan ito upang siya ay mapansin ng publiko at mabigyan ng tulong ng mga ahensya tulad ng DSWD.

Inilagay na sa pangangalaga ng DSWD si Rosemarie matapos siyang hanapin dahil sa kanyang viral video. Layunin ng DSWD na bigyan siya ng counseling at social reintegration assistance para sa kanyang ikabubuti. Bahagi ito ng plano para sa mas matibay na pagbangon niya mula sa insidente.

Matapos ang pag-viral ng video, agad na kumilos ang DSWD upang bigyan si Rosemarie ng tulong pinansyal. Ginamit ito bilang panimula ng sari-sari store upang makatulong sa kanyang kabuhayan. Maraming netizens ang natuwa at umaasang magagamit niya ito ng maayos.

Source: KAMI.com.gh