Sol Aragones, binasag ang katahimikan sa pagbatikos sa picture kasama si Marcoleta

-Dinepensahan ni Sol Aragones ang sarili matapos siyang makatanggap ng batikos sa pagtanggap ng suporta mula kay Rep. Rodante Marcoleta

-Giniit niyang bukas ang kanyang kampanya sa lahat ng gustong tumulong para sa kapakanan ng Laguna

-Iginiit din niya na hindi siya tumalikod sa paninindigan bilang tagapagtanggol ng malayang pamamahayag

-Sa kanyang Grand Rally, nagsama-sama ang mga lider mula sa iba’t ibang partido para sa iisang layunin

Mainit na pinag-uusapan sa social media at ilang sektor ng publiko ang pagtanggap ni Sol Aragones, kandidato sa pagka-gobernador ng Laguna, sa suporta ni Rep. Rodante Marcoleta.

Kilala si Marcoleta bilang isa sa mga mambabatas na tutol sa pag-renew ng prangkisa ng ABS-CBN, samantalang si Aragones ay naging isa sa mga kilalang mukha ng network bilang journalist. Dahil dito, hindi naiwasang batikusin si Aragones, lalo na ng mga tagasuporta ng press freedom at ilang dating kasamahan sa industriya.

Sa kabila ng kontrobersya, iginiit ni Aragones na ang kanyang kampanya ay bukas sa kahit sinong gustong tumulong sa layunin niyang makapagtayo ng maayos at kumpletong ospital para sa mga taga-Laguna. Aniya, ang kanyang laban ngayon ay hindi na tungkol sa personal na isyu kundi para sa kapakanan ng lalawigan. Ipinahayag din niya na ang mga ganitong pakikipag-alyansa ay hindi nangangahulugan ng pagtalikod sa dati niyang paninindigan bilang tagapagtanggol ng malayang pamamahayag.

Matatandaang sa kanyang Grand Rally noong Mayo 3, dumalo ang ilang prominenteng personalidad sa politika kabilang sina Bong Go, Pia Cayetano, Francis Tolentino, at iba pa. Ang presensiya ng mga ito ay ipinakita bilang simbolo na posible ang pagkakaisa kahit mula sa magkakaibang panig ng politika basta’t ang layunin ay para sa kabutihan ng mamamayan. Para kay Aragones, ito ay malinaw na patunay na ang tunay na adbokasiya ay hindi namimili ng kulay o partido.

Bago pasukin ang mundo ng politika, si Sol Aragones ay kilalang broadcast journalist ng ABS-CBN, kung saan siya ay naging anchor at reporter sa loob ng halos dalawang dekada. Tumakbo siya sa Kongreso noong 2013 at nagsilbi bilang kinatawan ng ikatlong distrito ng Laguna. Sa bawat termino niya bilang mambabatas, kilala siyang nagsusulong ng mga panukala ukol sa kalusugan, kababaihan, at edukasyon.

Ang kanyang kandidatura bilang gobernador ng Laguna ay tinutukan ng marami dahil sa kanyang media background at personal na kredibilidad sa publiko. Ngunit sa pagpasok ng endorsement mula kay Marcoleta, muli siyang nabalot ng intriga at pagdududa sa kanyang paninindigan bilang dating mamamahayag.

Ayon kay Ging Reyes, dating head ng ABS-CBN News and Current Affairs, nadismaya siya sa hakbang ni Aragones. Sa isang matapang na pahayag, sinabi niyang hindi niya inaasahan na ang isang dating mamamahayag na naging boses ng katotohanan ay kikilos ng taliwas sa ipinaglalaban noon. Marami sa dating mga kasamahan ni Aragones ang nagpahayag rin ng pagkabigla at lungkot.

Nagpahayag ng matinding galit ang komedyanteng si John Lapus matapos muling magyabang si Marcoleta na siya raw ang dahilan ng pagkakasara ng ABS-CBN. Ayon kay Lapus, ito ay isang malinaw na pagmamataas sa isang trahedyang sumira sa kabuhayan ng libo-libong empleyado. Tinawag pa niya si Marcoleta na “demonyo” sa isang viral na tweet.

Source: KAMI.com.gh