Pastor na suspek sa pagkamatay ng nursing student, sumuko sa Maynila

• Kusang sumuko sa mga awtoridad ang pastor na itinuturong suspek sa pagkamatay ng isang 20-anyos na nursing student matapos siyang matagpuan sa isang simbahan sa Quiapo, Maynila kung saan umano siya pansamantalang nagtungo matapos ang insidente
• Sa panayam, inamin ng suspek ang pagkakasangkot sa pagkamatay ng biktima at nagbigay ng kaniyang bersyon ng mga pangyayari, habang mariin namang kinuwestiyon ng pamilya ng biktima ang ilan sa kanyang mga alegasyon
• Ayon sa pulisya, nagpapatuloy pa ang imbestigasyon, kabilang ang paghihintay sa opisyal na resulta ng autopsy upang malinawan ang ilang mahahalagang detalye kaugnay ng kaso
• Nananatili sa kustodiya ng Calapan City police ang suspek habang inihahanda ng mga awtoridad ang pagsasampa ng kasong murder kaugnay sa insidenteng ikinagulat ng maraming residente sa Oriental Mindoro

Kusang sumuko sa mga awtoridad ang isang pastor na itinuturong suspek sa pagkamatay ng isang third-year nursing student sa Calapan City, Oriental Mindoro.

Ayon kay Police Col. Gerry Laylo ng Regional Intelligence Division ng Mimaropa police, nagtungo sila sa isang simbahan sa Quiapo, Maynila matapos makatanggap ng impormasyon na roon matatagpuan ang suspek. Sa tulong ng isa pang pastor, naging maayos ang kanyang pagsuko.

Read also

Rosmar Tan, may matapang na pahayag tungkol sa akusasyong money laundering

“Kusang siyang sumama pagdating na pagdating namin, pagkapakilala ko sa sarili ko. Kasi kausap ko yung pastor nakausap niya. Pinakilala ako, nagpakilala ako. Nagpakilala din siya sa akin na, ‘Kayo po ba yung pinadala ni Pastor?’ ‘Opo, ako. Ako po yun si Colonel Laylo, pinadala ni Pastor,’” ayon kay Laylo.

Sa panayam ng ABS-CBN News, inamin ng suspek ang kanyang pagkakasangkot sa insidente. Iginiit niya na mayroon silang naging relasyon ng biktima sa loob ng mahigit isang buwan at sinabi niyang nais niya umanong ayusin ang kanilang hindi pagkakaunawaan bago naganap ang insidente.

“Inamin ko po ang nagawa kong pagpaslang… Dahil na din po sa matagal niya pong pagba-blackmail sa akin at laging pinipilit na sumama sa kanya at bumalik po sa kanya,” ani ng suspek.

Idinagdag pa niya: “Ang inaano niya po kasi sa akin na buntis daw siya tapos ako ang ama kahit wala naman pong nangyari sa amin. Halos ilang buwan po yun na lagi niya pong sinasabi sa akin. Paulit-ulit lang po.”

Gayunman, mariing pinabulaanan ng ama ng biktima na si Roden Gabayno ang mga alegasyong ibinabato ng suspek laban sa kanyang anak. Aniya, walang nabanggit ang kanyang anak tungkol sa sinasabi nitong mayroon silang relasyon.

Read also

Selos at hinala, nauwi sa trahedya; mister, inaresto sa Cebu City

Ayon din sa ama, wala siyang kaalaman na buntis ang kanyang anak.

Samantala, itinanggi ng suspek ang alegasyong r*pe at sinabi niyang wala umano itong naganap. Humingi rin siya ng paumanhin sa pamilya ng biktima at ipinahayag na nais niyang akuin ang responsibilidad sa kanyang mga naging desisyon.

“Sana po ay, kung galit sila sa akin, sa akin na lang. Huwag na po nila idamay ang pamilya ko at yung pangalan ng ibang mga pastor,” aniya.

Ayon kay Calapan police chief Lt. Col. Michael Caraggayan, hinihintay pa ng mga imbestigador ang resulta ng autopsy upang matukoy ang iba pang detalye kaugnay ng kaso.

Natagpuan ang katawan ng biktima noong madaling-araw ng Sabado sa isang madamong bahagi ng Barangay Sapul sa Calapan City. Kasalukuyang nakaburol ang kanyang labi sa kanilang tahanan sa Barangay Labonan, Bongabong, Oriental Mindoro.

Sa iba pang balitang may kaugnayan sa mga kaso na sinusubaybayan ng publiko, naiulat din kamakailan ng KAMI ang ilang mahahalagang developments sa kaso ni Charles Usi.

Read also

Boy Tapang, ninakawan umano ng college student na kaniyang empleyado

Sa ulat na ito, tinalakay ang mga bagong impormasyong lumutang kaugnay sa kaso ni Charles Usi. Nagbigay ito ng karagdagang detalye tungkol sa mga pangalang umano'y nabanggit sa usapin. Patuloy ring sinusubaybayan ng publiko ang mga susunod na developments kaugnay sa isyu.

Ibinahagi sa ulat na ito ang panawagan ng mga magulang ni Charles Usi para sa mabilis na pag-usad ng imbestigasyon. Inilahad nila ang kanilang panig at kahilingan para sa hustisya. Nagbigay rin sila ng mensahe sa mga awtoridad at sa publiko kaugnay ng kaso.

Source: KAMI.com.gh