Rendon Labador, hindi na bahagi ng ‘93-day weight loss program’ ng PNP

• Kumpirmado mula sa PNP na wala na si Rendon Labador sa kanilang fitness initiative at hindi siya kailanman opisyal na in-hire bilang coach para sa buong programa
• Ayon sa PCADG, may kalituhan lamang tungkol sa naging papel ni Labador sa loob ng 93-day weight loss program para sa mga pulis
• Nanindigan ang PNP na layunin pa rin nilang i-promote ang physical wellness at open sila sa mga suhestiyon kung paano ito mapapabuti
• Sa ngayon, mas pinagtutuunan ng pansin ng PNP ang kanilang relaunch ng ‘Pulisteniks’ bilang bahagi ng wellness push ni PNP Chief Gen. Nicolas Torre III

Naglabas ng paglilinaw ang Philippine National Police – Police Community Affairs and Development Group (PNP-PCADG) kaugnay ng pagkakaugnay ng social media personality na si Rendon Labador sa kanilang fitness initiative.

Ayon sa pahayag mula sa PNP, hindi na bahagi si Labador ng anumang aktibidad ng ahensya at hindi rin siya opisyal na kinuha bilang fitness coach para sa buong programa ng kapulisan.

Kinumpirma ito ni PNP spokesperson Brigadier General Jean Fajardo. Dagdag pa ni PCADG Director Brigadier General Marvin Joe Saro, nagkaroon lamang ng hindi pagkakaintindihan ukol sa naging “terms of engagement” kay Labador. Hindi umano siya kailanman kinontrata para pangunahan ang kabuuang fitness program ng PNP, kundi bahagi lang ng isang internal motivation activity—ang tinatawag na “93-day weight loss program.”

Nilinaw din ng PNP na ang partisipasyon ni Labador ay para lang sa pagbibigay-inspirasyon sa mga tauhan ng pulisya na panatilihin ang pagiging fit at healthy. Hindi nila direktang sinabi kung naapektuhan ng public backlash ang naging desisyon, ngunit tiniyak nila na bukas sila sa mga suhestiyon kung paano pa mapapaigting ang kampanya sa kalusugan sa hanay ng kapulisan.

Kamakailan, muling inilunsad ng PNP ang kanilang “Pulisteniks” program, isang nationwide initiative na layuning hikayatin ang lahat ng miyembro ng kapulisan na maging mas aktibo at physically ready. Ayon kay PNP Chief General Nicolas Torre III, napakahalaga ng pagiging malusog ng katawan para sa epektibong pagtupad ng tungkulin sa bayan.

Si Rendon Labador ay isang kilalang personalidad sa social media na sumikat sa kanyang mga motivational content, fitness videos, at kontrobersyal na opinyon sa iba’t ibang isyu. Bukod sa kanyang image bilang fitness advocate, madalas din siyang ma-involve sa mga viral topics online. Kilala rin siya sa kanyang matapang na pananalita at pagkontra sa ilang social media figures, dahilan para laging inaabangan ang kanyang content ng netizens.

Naglabas ng reaksyon si Rendon Labador tungkol sa paggamit ng isang menor de edad sa content ng vlogger na si Ser Geybin. Ayon kay Rendon, hindi raw tama ang pagkakasali ng bata sa ganoong klaseng video content, at pinanindigan niyang dapat ay may limitasyon ang paglikha ng entertainment content, lalo na kung may kabataang sangkot. Umani ito ng iba’t ibang reaksyon mula sa netizens.

Sa isa namang nakakatuwang post, ibinahagi ni Rendon Labador ang kanyang interes na bumili ng unggoy bilang alaga. Sa kanyang caption, tinanong pa niya ang kanyang followers kung ano ang magandang ipangalan dito. Marami ang natuwa at nagkomento ng mga nakakatawang pangalan na bagay daw sa bagong "kaibigan" ni Rendon.

Source: KAMI.com.gh