NAIA bollard, viral sa social media matapos ang malagim na SUV crash

-Isang bollard sa NAIA Terminal 1 ang nawasak matapos banggain ng SUV na ikinasawi ng dalawang katao

-Viral ang larawan ng natumbang bollard na tila mababaw lamang ang pagkakabaon sa semento

-Maraming netizens ang naglabas ng saloobin sa social media, galit at paninisi sa gobyerno ang nangingibabaw

-Hindi pa naglalabas ng pahayag ang NAIA management pero nangakong sasagutin ang lahat ng pinsala

Umaga ng Linggo, Mayo 4, 2025, naging laman ng social media ang isang trahedya sa Ninoy Aquino International Airport Terminal 1. Isang SUV ang sumalpok sa bollard sa harap ng terminal na humantong sa pagkamatay ng dalawang katao. Agad na kumalat sa internet ang larawan ng bollard na tila mababaw lamang ang pagkakabaon, dahilan upang bumigay ito sa impact ng sasakyan.

Ang larawang ito ay naging simbolo ng pagkadismaya ng publiko sa umano'y kakulangan sa kalidad ng imprastraktura ng gobyerno. Ayon sa mga eksperto, ang mga bollard ay sadyang inilalagay upang magsilbing proteksyon sa mga pedestrian at ari-arian mula sa mga aksidenteng kinasasangkutan ng sasakyan. Ngunit kung hindi ito maayos ang pagkakakabit, hindi nito nagagampanan ang layunin nito bilang "life-saving barrier."

"Even with the bollard, are you still saving money?" ang isa sa mga mababasa sa mga komento online, patama sa tila pagtitipid ng gobyerno sa seguridad ng publiko. "That's a FPRRD project, it was badly rigged!" dagdag pa ng isa, habang ang iba ay tinutuligsa ang dating administrasyon na umano'y may kinalaman sa proyekto. May ilan ding naglabas ng pagkabahala at panawagan para sa agarang aksyon: "This should be a wake-up call!"

Sa likod ng simpleng bollard ay ang masalimuot na usapin ng korapsyon at kapabayaan sa mga proyektong pampubliko. Ilang taon nang isinusumbong ang mga substandard na imprastraktura sa bansa, kung saan mas inuuna raw ang kita kaysa kaligtasan. Hindi ito ang unang pagkakataon na may bumigay na bahagi ng pampublikong pasilidad na may kinalaman sa kawalan ng tamang materyales o installation.

Ipinapakita ng insidenteng ito kung gaano kaimportante ang transparency at tamang pag-awdit sa bawat proyektong pinopondohan ng kaban ng bayan. Kung talagang layunin ng mga proyekto ay ang kaligtasan ng mamamayan, hindi dapat ito binabara ng red tape o tinipid sa kalidad.

Ayon sa Corruption Perceptions Index (CPI) 2023 ng Transparency International, nakakuha ang Pilipinas ng score na 34 sa 100 at pumwesto sa ika-115 sa 180 bansa, na nagpapakita ng patuloy na mababang performance sa paglaban sa katiwalian. Bahagya man ang pagtaas mula sa score na 33 noong 2022, nananatiling mababa ang tiwala sa integridad ng mga institusyon, partikular sa sektor ng gobyerno, procurement, at mga proyektong imprastraktura.

Ayon sa ulat, ang sistematikong korapsyon at kahinaan sa pagpapatupad ng batas ay patuloy na humahadlang sa tunay na reporma at tiwala ng publiko. Ilan sa mga pangunahing isyung ibinabato sa pamahalaan ay ang ghost projects, overpricing, padrino system, at pagkakasangkot ng ilang opisyal sa ilegal na aktibidad gaya ng smuggling at droga.

Sa gitna ng isyu ng bollard sa NAIA, muling umugong ang panawagan para sa tapat na serbisyo mula sa gobyerno. Si Ogie Diaz, kilalang personalidad sa showbiz, ay nagpahayag ng kanyang saloobin sa pamamagitan ng isang makahulugang mensahe para sa mga pulitiko: “Ang tunay na legasiya ay ang tapat na serbisyo.” Sa kanyang post, ipinunto niya na mas mahalaga ang integridad at responsibilidad sa paglilingkod kaysa pansariling kapakinabangan.

Si Anne Curtis naman ay hindi napigilang maglabas ng damdamin kaugnay sa trahedya. Sa isang heartfelt na post, nanawagan siya sa mga kinauukulan na huwag hayaang maulit pa ang ganoong pangyayari. Aniya, dapat ay "wake-up call" na ito para sa mga opisyal ng gobyerno upang pagtuunan ng pansin ang kaligtasan sa mga pampublikong lugar.

Source: KAMI.com.gh