Mariel Pamintuan, trending sa parody song laban sa “ghost projects”: “Pilipino, mag-ingay!”

• Viral ang parody song na “CROCS’ DEN” ni Mariel Pamintuan laban sa umano’y anomalya sa flood-control projects
• Sa loob ng 13 oras ay nakapagtala ito ng higit 4.2 milyon na views sa Facebook
• Nilaman ng kanta ang panawagan laban sa korapsyon at band aid solution sa problema ng pagbaha
• Umani ng papuri si Mariel mula sa netizens na tinawag siyang “tunay na influencer”

Viral ngayon online ang parody song na ginawa ng aktres na si Mariel Pamintuan kung saan pinasaringan niya ang mga dawit umano sa anomalya sa flood-control projects ng bansa. Sa music video na inupload sa kanyang Facebook page noong Setyembre 10, 2025, ipinakita ng aktres ang masining ngunit matapang na paraan ng pagbubunyag ng hinaing ng taumbayan ukol sa “ghost projects” na patuloy na nauuwi sa pagbaha.

Pinamagatan niyang “CROCS’ DEN” ang parody song na hango sa kantang “Golden” mula sa pelikulang KPop Demon Hunters. Sa caption ng kanyang post, diretso niyang sinabi: “Tatahimik nalang ba tayo? Pilipino, mag-ingay!”

Read also

Ex-DPWH engineer, naglabas ng litrato ng umano’y bulto ng pera para sa flood control projects

Hindi lamang simpleng aliw ang hatid ng parody kundi malalim na panawagan laban sa paulit-ulit na problemang dulot ng maling paggamit ng pondo. Dagdag ni Mariel sa kanyang komento sa sariling post, “Tama na po sa band aid solution na relief goods, etc. Pagod na po ang mga tao magsurvive. Kailangan po namin maayos na kalsada, hindi binabaha. Ngayon alam na natin ang kaban ng bayan, kayang-kaya maayos ang mga problema ng bansa. Kung sana po ay may natitirang malasakit sa kapwa, solusyunan ang totoong problema.”

Hindi rin nakaligtas sa kanyang mensahe ang pagkadismaya sa patuloy na survival mode ng maraming Pilipino: “Ang materyal na bagay naluluma, nasisira. Pero kung ang billion ginagamit po sa tama, legacy, dignidad at pagmamahal ng Pilipino habang buhay yan.”

Para kay Mariel, mahalaga ring makita ang mas malawak na pangarap para sa bansa: “Sana balang-araw hindi na natin kailangan dumayo sa ibang bansa dahil busog sa sagana at ganda ang Pilipinas.”

Read also

Korina Sanchez, nagsalita matapos mag-viral muli ang interview niya kay Sylvia Sanchez

Mabilis na umani ng reaksiyon mula sa netizens ang video. Sa loob lamang ng 13 oras, pumalo na ito sa mahigit 4.2 milyong views. Marami ang pumuri kay Mariel sa kanyang pagiging matapang at tinawag siyang “tunay na influencer” na ginagamit ang plataporma hindi lang para sa entertainment kundi para rin magmulat.

May mga netizens na nagbahagi ng sariling hinaing: “Natatawa pa ko sa intro, but while listening to this song nalungkot talaga ako.. True na true, walang katapusang tanong. San damakmak na ang evidence pero walang kulong. Justice to the Filipino people!!!” May iba namang nag-ugnay ng kanta sa paparating na eleksyon: “Kaya sana maging aral na saatin ito. Sa darating na election sa 2028 wag na Tayo papabudol sa mga pangako nila…”

Samantala, ilang komento ang tumama sa emosyon ng manonood: “HAHAHA bakit naiiyak ako.” “Yung lines na ‘Daming questions tapos ending, No kulong jail’ really hits hard!!!” at “This is not just a parody... But a reality.”

Read also

Sen. Kiko Pangilinan, kinuwestiyon ang sworn statement ng Discaya couple

Si Mariel Pamintuan ay isang aktres at singer na unang nakilala sa mga youth-oriented shows at teleserye. Bukod sa kanyang career sa telebisyon, madalas ding napapansin ang kanyang vocal talent at social media presence. Sa mga nagdaang taon, unti-unti siyang naging mas bukas sa pagbabahagi ng kanyang pananaw sa mga isyung panlipunan, dahilan upang mas makita ng publiko ang kanyang lawak bilang artista at bilang Pilipinong may malasakit.

Kamakailan, naging viral din si Mariel matapos ang paglabas ng behind-the-scenes video kasama sina Kyline Alcantara. Ayon sa ulat ng KAMI, marami ang natuwa sa natural na chemistry at kulitan ng dalawa, dahilan upang umani ng libo-libong views ang kanilang BTS clip. Ang eksenang ito ay nagpatunay sa likas na galing ni Mariel bilang aktres na madaling makagaan ng loob ng kanyang mga kasamahan.

Bukod pa rito, naging usap-usapan din ang matapang na pahayag ni Mariel laban sa mga “chaka na manloloko.” Sa report ng KAMI, hinikayat niya ang publiko na huwag ibaba ang standards pagdating sa relasyon at huwag magpaloko sa matatamis na salita. Ang kanyang mensahe ay tumama lalo na sa mga netizens na naka-relate sa kanyang karanasan at naging dahilan para mas madami ang humanga sa kanyang pagiging prangka.

Source: KAMI.com.gh