Rufa Mae Quinto, nag-post ukol sa "celebration of life" para sa mister niya

• Si Rufa Mae Quinto ay nagbahagi ng isang emosyonal na update sa Instagram
• Ito ay tungkol sa "celebration of life" na isinagawa para sa yumaong mister niya
• Sa naturang post, maraming tao ang binanggit at pinasalamatan ni Rufa Mae
• Dahil dito, marami ang natuwa na malakas ang support system ng kanilang idol

Si Rufa Mae Quinto, isang kilalang aktres at komedyante sa Pilipinas, ay nagbahagi ng isang emosyonal na update sa Instagram tungkol sa "celebration of life" na kanilang isinagawa para sa kanyang yumaong asawa na si Trevor Magallanes, bagay na nagpaantig sa puso ng marami.

Noong Sunday, August 17, nag-upload si Rufa ng isang reel na naglalaman ng mga snippets mula sa naturang paggunita. Kalakip nito ay isang mahaba at taos-pusong caption kung saan pinasalamatan niya ang mga taong nagbigay ng suporta at pagmamahal sa kanya sa gitna ng mabigat na pagsubok na kanyang pinagdaraanan, bagay na ikinatuwa naman ng mga fans niya.

"Yesterday, 15 August 2025, was the celebration of life of my husband, Trevor. Dumating ang mga kaibigan ko para suportahan at tulungan ako: Shellie from South Carolina, Ryan from Los Angeles, California, Wendy from Chicago, Illinois, Mafae from Stockton, Wendy from SF, Hazel from Nashville, Tennessee, and LJ from Sacramento, California at ang napakarami pang nagmamahal sa akin. Pasensya na sa mga hindi ko mabati. Mahal ko kayo," ani Rufa sa kanyang viral post.

Ibinahagi rin niya kung paano nila inihanda ang venue para sa isang espesyal at makabuluhang selebrasyon ng buhay ni Trevor. "Inihanda namin ang hall at courtyard para sa celebration of life. Maraming family, friends, at workmates ang dumating para mag bigay-pugay sa kanya. Meron ding playroom para sa mga bata to honor Trev, the gamer. We will keep you posted sa mga ganap namin dito. Please patuloy niyong ipagdasal ang kapayapaan ni Trev," dagdag pa ng aktres.

Sa pamamagitan ng kanyang update sa naturang photo-sharing app, ipinakita ni Rufa Mae ang kanyang tapang at pasasalamat sa mga kaibigan, pamilya, at tagasuporta na patuloy na nagbibigay-lakas sa kanya sa gitna ng pagkawala ng kanyang pinakamamahal na asawa.

Panoorin ang reel sa ibaba:

Si Rufa Mae Quinto ay isang kilalang Filipina aktres at komedyante. Kilala siya sa kanyang campy na humor at natatanging istilo sa pagpapatawa, na naging dahilan upang maging mahalagang personalidad siya sa kulturang pop ng Pilipinas. Nagsimula ang kanyang karera sa showbiz noong 1996 sa variety show na That's Entertainment. Sa takbo ng kanyang karera, naging bahagi siya ng maraming matagumpay na pelikula. Sa kanyang personal na buhay, ikinasal siya kay Trevor Magallanes noong 2016 at biniyayaan sila ng anak na babae na si Athena noong 2017.

Sa nakaraang ulat ng KAMI ay naglabas ng pahayag si Rufa Mae Quinto tungkol sa pagpanaw ng mister niya. Sa Facebook, nakiusap ang aktres na respetuhin ang privacy niya at ng kanilang anak. Aniya Rufa, sana ay hindi rin gamitin ang pagpanaw ni Trevor Magallanes bilang content. Gayunpaman, nagpasalamat pa rin ang aktres sa mga taong nakikiramay.

Samantalang noong April, kinilig ang mga fans sa masayang pagkikita nina Rufa Mae Quinto at Anne Curtis. Sa Bacolod-Silay International Airport, nagkasalubong ang dalawa kung saan masayang niyakap ni Rufa si Anne. Ibinahagi rin ni Rufa ang nakakatuwang pag-uusap ni Anne at ng anak niyang si Athena, na talaga namang kinatuwaan ng mga netizens.

Source: KAMI.com.gh