Ruffa Gutierrez, inaming may “bump” sa relasyon nila ni Herbert Bautista

• Inamin ni Ruffa Gutierrez na hindi muna sila nag-uusap ni Herbert Bautista
• Nilinaw ng aktres na dumadaan sila sa isang "bump" sa kanilang relasyon
• Sa kabila nito, pinuri pa rin niya si Herbert at sinabing marami siyang natutunan dito
• Binuksan din ni Ruffa ang posibilidad na ang espasyong ito ay magsilbing panahon ng pagninilay

Dumaan umano sa isang “bump in the road” ang relasyon nina Ruffa Gutierrez at Herbert Bautista ayon sa aktres sa panayam niya kay Boy Abunda nitong Huwebes sa Fast Talk with Boy Abunda. Ayon kay Ruffa, hindi sila kasalukuyang nag-uusap at tanging panahon lamang ang makapagsasabi kung muli silang mag-uusap at magpapatuloy sa kanilang relasyon.

“We’re going through a bump right now and we’re not speaking. So let’s see if that bump will last or we'll speak again. I don’t know,” ani Ruffa, na tila bukas rin sa posibilidad ng pagbabago sa kanilang sitwasyon.

Para kay Ruffa, ang kasalukuyang espasyo ay maaaring magbigay linaw sa kanila matapos ang limang taon simula nang muli silang magkatrabaho sa isang proyekto.

Sa kabila ng kasalukuyang tampuhan, hindi nagpaawat si Ruffa sa pagbibigay ng papuri kay Herbert.

Kilala si Herbert sa kanyang pagiging supportive at ito rin umano ang nagtulak kay Ruffa na magpatuloy sa pag-aaral. Noong 2022, nagtapos si Ruffa ng Bachelor’s degree sa Communication Arts mula sa Philippine Women’s University.

Nilinaw din ni Ruffa na hindi sila nagsasama sa iisang bubong ni Herbert, at hindi siya naniniwala sa live-in setup.

Matagal na palang magkakilala sina Ruffa at Herbert—una silang nagkita nang si Ruffa ay 13 taong gulang pa lamang. “Nakasalamin pa ako, kulot-kulot ang hair ko… Wala, dedma,” pagbabalik-tanaw niya. Sa edad na 17, binigyan siya ni Herbert ng libro bilang paghahanda sa Miss World.

Tinanong din si Ruffa kung napag-usapan na ba nila ang tungkol sa kasal. “Marriage is very difficult. I don’t know if I’m ready for that step yet. Herbert’s also not ready,” aniya. Mas pinahahalagahan niya ngayon ang pagkakaroon ng lifetime companion kaysa sa mismong ideya ng kasal.

Si Ruffa Gutierrez ay isang kilalang aktres, beauty queen, at television personality sa Pilipinas. Isa siya sa mga anak nina Annabelle Rama at Eddie Gutierrez. Matapos ang kanyang failed marriage sa Turkish businessman na si Yilmaz Bektas, nanatili siyang aktibo sa showbiz at edukasyon. Si Herbert Bautista naman ay isang dating aktor at alkalde ng Quezon City, kilala rin sa kanyang mga proyekto sa lokal na pamahalaan at ilang pelikula at palabas sa telebisyon.

Naglabas ng emosyon si Ruffa sa social media kaugnay ng matinding pag-aalala sa inang si Annabelle Rama matapos itong ma-ospital. Aniya, mahal na mahal niya ang kanyang ina at labis siyang nagpasalamat sa mga doktor na nag-asikaso rito. Sa gitna ng personal na pinagdaraanan, nanatiling matatag si Ruffa para sa kanyang pamilya.

Naging emosyonal para sa mga anak ni Ruffa na sina Lorin at Venice ang muling pagkikita nila ng kanilang ama sa Turkey. Sa mga larawan na ibinahagi, makikitang masaya at kumpleto ang bonding ng mag-aama sa summer vacation nila. Patuloy ang pagbibigay halaga ni Ruffa sa pagkakaroon ng magandang relasyon ng kanyang mga anak sa kanilang ama.

Source: KAMI.com.gh