Pacquiao, nanawagan ng panalangin para sa dating trainer na may stage 4 cancer

- Dinalaw ni Manny Pacquiao si Jonathan Penalosa sa Bacolod City Riverside Hospital

- Nasa stage 4 na ang colon cancer na kinakaharap ni Penalosa matapos sumailalim sa operasyon

- Nanawagan si Pacquiao ng dasal para sa paggaling ng matagal na kaibigan at kasamang trainer

- Matagal nang bahagi si Penalosa ng training team ni Pacquiao sa mga malalaking laban

Sa kabila ng abalang kampanya para sa kanyang muling pagtakbo bilang senador, naglaan ng oras si boxing legend Manny Pacquiao upang dalawin ang matagal na kaibigan at dating trainer na si Jonathan Penalosa, na kasalukuyang nakikipaglaban sa stage 4 colon cancer.

Nag-post si Pacquiao sa kanyang social media account ng litrato habang nasa Bacolod City Riverside Hospital kung saan naka-confine si Penalosa. Kasama rin sa post ang ilang lumang larawan ng kanilang mga training session, kapwa sa Pilipinas at sa Wild Card Gym sa Hollywood, California.

“Please join me in praying for Jonathan Penalosa Sr. Isa po siya sa mga matagal ko nang trainers at kaibigan,” ani Pacquiao sa kanyang caption. Dagdag pa niya, “Ipagdasal din natin ang buong pamilya niya sa panahon na ito. Patuloy tayong naniniwala sa kagalingan at kalakasan na galing sa Diyos.”

Hindi matatawaran ang kontribusyon ni Penalosa sa tagumpay ni Pacquiao sa loob ng ring. Kabilang siya sa mga lokal na trainers na naging bahagi ng ilang malalaking laban ni Pacquiao gaya ng mga title fights kontra Tim Bradley, Jeff Horn, at Lucas Matthysse. Muli rin siyang naging bahagi ng training team ng Pambansang Kamao sa exhibition match nito laban kay South Korean martial artist DK Yoo noong 2022.

Ayon kay Pacquiao, higit pa sa pagiging trainer si Penalosa—isa itong tunay na kaibigan. “Jonathan is not just a part of my team, he’s part of my life,” wika niya. “We’ve shared victories, struggles, and prayers together. Now I’m here for him in this fight of his life.”

Si Jonathan ay bahagi ng tanyag na Penalosa boxing clan, anak ni Carl Penalosa na dalawang beses naging Philippine super-lightweight champion. Nakipaglaban siya bilang propesyonal mula 1985 hanggang 1993, nagtala ng record na 15 panalo, 4 talo at 1 draw, kabilang ang 7 knockouts. Noong 1992, sumubok siyang kunin ang WBA flyweight title ngunit natalo sa ika-anim na round kontra kay Yong Kang Kim sa South Korea.

Hindi rin basta-basta ang mga nakaharap niyang kalaban tulad nina Chatchai Sasakul, Manny Melchor, Jess Maca, at Emil Romano—mga dekalibreng boksingero na nagsilbing hamon sa kanyang karera.

Si Manny "Pacman" Pacquiao ay isang Pilipinong boksingero, politiko, at philanthropist na kilala bilang kauna-unahang eight-division world champion sa kasaysayan ng boxing. Nagsimula siya sa hirap bilang construction worker at nagbenta ng pan de sal sa kalye bago makilala sa mundo ng boksing. Bukod sa tagumpay sa ring, pinasok rin niya ang serbisyo publiko bilang kongresista at senador ng Pilipinas. Kilala rin siya sa pagiging relihiyoso at sa kanyang mga gawaing pangkawanggawa sa iba’t ibang panig ng bansa.

Si Manny ay agad na kumilos matapos masangkot ang ilang miyembro ng kanyang staff sa insidente ng paglabag sa trapiko. Tinanggal niya ang mga ito sa kanyang grupo bilang bahagi ng kanyang paninindigan laban sa katiwalian at pag-abuso sa kapangyarihan.

Nagpahayag si Manny Pacquiao ng kanyang pagmamahal at suporta sa kanyang anak na si Jimuel sa pamamagitan ng isang emosyonal na mensahe sa kaarawan nito. Ipinakita niya ang kanyang pagiging mapagmahal na ama at ang kanilang matibay na ugnayan bilang pamilya.

Proofreading by Glory Mae Monserate, copy editor at KAMI.com.gh.

Source: KAMI.com.gh