Dennis Padilla, hiling na makausap nang masinsinan ang mga anak

- Umaasa si Dennis Padilla na magkaroon ng mahabang usapan kasama ang kanyang mga anak na sina Julia, Claudia, at Leon

- Binahagi niya ang kagustuhang makipag-usap nang bukas at maayos tungkol sa kanilang kasalukuyang buhay at relasyon

- Ginagawa ni Dennis ang pagbati sa kanyang mga anak sa social media tuwing espesyal na okasyon upang ipakita ang pagmamalasakit

- Aminado siyang may mga pagkukulang noon bilang ama ngunit naniniwala siyang nananatili ang kanyang pagmamahal sa mga anak

Umaasa si Dennis Padilla na magkakaroon siya ng pagkakataong makausap nang masinsinan ang kanyang mga anak na sina Julia, Claudia, at Leon Barretto. Sa isang panayam kay Julius Babao, ibinahagi ng komedyante ang kanyang kagustuhang magkaroon ng bukas at mahabang talakayan kasama ang mga anak, na matagal na niyang hindi nakakasama nang personal.

Ayon kay Dennis, huling pagkakataon na nakausap niya si Julia nang harapan ay apat na taon na ang nakalipas. Umaasa siyang magkakaroon ng pagkakataon upang pakinggan muna ang kanyang mga anak bago niya ipahayag ang kanyang damdamin at karanasan. Nilinaw niyang nais niya ng isang maayos na pag-uusap kung saan mapag-uusapan lamang ang kasalukuyang mga pangyayari sa kanilang buhay, nang walang pagbabalik-tanaw sa mga masakit na alaala.

Read also

Dennis Padilla, ibinida ang kanyang collection ng magazine covers ni Julia Barretto

Sa kabila ng kanilang pagkakahiwalay, nagpapakita pa rin si Dennis ng pagmamahal sa kanyang mga anak. Sa tuwing may espesyal na okasyon, tulad ng kanilang mga kaarawan, nagpo-post siya ng pagbati sa social media upang iparating ang kanyang pagmamalasakit, kahit pa hindi ito kadalasang sinasagot. Para sa kanya, ang mahalaga ay makita ng kanyang mga anak na patuloy siyang nagre-reach out.

Aminado si Dennis na may mga pagkukulang siya bilang ama noong nakaraan, kabilang na ang emosyonal at pinansyal na aspeto. Gayunpaman, naniniwala siyang ang pagmamahal niya sa kanyang mga anak ay nananatiling buo at matatag. Umaasa rin siyang kapag naging mga magulang na ang kanyang mga anak, mauunawaan nila ang kanyang naging karanasan bilang ama.

Sa kabila ng hindi madalas na pakikipag-usap sa kanyang mga anak, tuwang-tuwa si Dennis sa bawat pagkakataong nakakatanggap siya ng mensahe mula sa kanila. Para sa kanya, kahit ang pinakamaikling pagbati ay nagdudulot ng malaking saya, na nagpapalakas ng kanyang pag-asa na muling mapalapit sa kanyang mga anak.

Read also

Ivana Alawi, pinasilip ang pinatayong bahay sa pamamagitan ng isang house tour

Si Dennis Padilla o Dennis Esteban Dominguez Baldivia ay isang Filipino comedian, TV host, radio broadcaster at aktor. Anak siya ni Dencio Padilla, at siya ang ama ni Julia Barretto. Nagsilbi siya bilang konsehal ng Caloocan City noong 2001.

Matatandaang muling naging usap-usapan ang mag-aama matapos mag-post ni Dennis Padilla ng mensahe niya para sa tatlong anak na sina Julia, Claudia at Leon Barretto. Sinabi niya sa mga ito na nakalimutan siyang batiin ng mga anak noong Father's Day.

Samatala, isang sulat ang binahagi ni Dennis kung saan nilabas niya ang saloobin tungkol sa kanyang pagiging ama. Aminado siyang pinagsisihan niya ang mga maling bagay na kanyang nagawa sa kanyang buhay.

Source: KAMI.com.gh