Pamilya, nagbahagi ng detalye sa biglaang pagpanaw ni Vanessa Blanca
- Nagbahagi ang pamilya ni Vanessa Blanca ng mas detalyadong pahayag tungkol sa biglaang pagpanaw ng 30-anyos na mang-aawit noong Agosto 19, matapos unang ipaalam ng kanyang pinsang si Ivy na nagkaroon siya ng insidente sa condominium na kanyang tinutuluyan sa Manila
- Ayon kay Ivy, habang naghahanda si Vanessa sa banyo ay aksidenteng natumba at nagtamo ng matinding pinsala sa ulo, dahilan upang agad silang humingi ng emergency assistance at tumawag ng ambulansiya
- Sinabi rin ng pamilya na habang hinihintay ang ambulansiya ay sinikap ng mga kasama ni Vanessa na madala siya sa pinakamalapit na ospital, ngunit sa kabila ng mga ginawang hakbang ay hindi na siya nailigtas
- Hinikayat ng pamilya ang publiko na iwasan ang mga haka-haka tungkol sa nangyari at igalang ang kanilang pagdadalamhati, habang patuloy namang inaalala ng mga dating ka-grupo sa Sugarpop at mga kasamahan sa musika ang naiwan niyang alaala
PAY ATTENTION: stay informed and follow us on Google News!
Nagbigay ang pamilya ni Vanessa Blanca ng bagong detalye tungkol sa nangyari bago ang biglaang pagpanaw ng 30-anyos na mang-aawit noong Agosto 19.
Source: Facebook
Si Vanessa, na nakilala bilang isa sa mga mang-aawit ng hit na “DOTA O Ako” kasama ang songwriter at rapper na si Aikee, ay unang naiulat na pumanaw matapos ang isang insidente sa condominium na kanyang tinutuluyan sa Manila.
Ang kanyang pinsang si Ivy ang unang nag-anunsiyo ng malungkot na balita sa social media. Makalipas ang ilang oras, naglabas siya ng karagdagang pahayag upang ipaliwanag ang kalagayan ni Vanessa at ang mga naging hakbang bago siya dinala sa pagamutan.
Ayon kay Ivy, nagtamo si Vanessa ng matinding pinsala sa ulo na nagresulta sa pagdurugo sa loob ng utak matapos ang isang aksidenteng pagkakatumba.
PAY ATTENTION: Follow us on Instagram - get the most important news directly in your favourite app!
Sinabi niya na naghahanda umano si Vanessa sa banyo nang aksidenteng matumba. Agad namang humingi ng emergency assistance ang kanyang mga kasama at tumawag ng ambulansiya.
Gayunman, ayon sa pahayag ng pinsan, lumipas ang humigit-kumulang 15 minuto ngunit hindi pa dumarating ang ambulansiya. Dahil kailangan ni Vanessa ng agarang atensiyong medikal, sinikap ng kanyang mga kasama na dalhin siya sa pinakamalapit na ospital gamit ang wheelchair.
Dagdag pa ni Ivy, naging mas mahirap ang sitwasyon dahil wala silang agad na mahanap na tricycle o iba pang sasakyan para sa kanilang transportasyon. Sa kabila ng kanilang pagsisikap na makakuha ng tulong at madala si Vanessa sa ospital, pumanaw ito.
Nilinaw ni Ivy na ibinahagi ng pamilya ang impormasyon upang mabigyan ng malinaw na sagot ang mga nagtatanong tungkol sa nangyari, ngunit hindi ito ginawa upang manisi o makadagdag sa kanilang pinagdaraanan.
Hiniling din niya sa publiko na iwasan ang pagbibigay ng haka-haka at bigyan ng respeto ang pamilya habang hinaharap nila ang pagkawala ni Vanessa.
“We humbly ask for your prayers, understanding, and respect during this difficult time. Rest peacefully, our beloved Vanessa,” saad ni Ivy sa pagtatapos ng kanyang mensahe.
Samantala, nagbigay rin ng sariling tribute si Aikee matapos ang balita. Muli niyang ibinahagi ang kanilang kantang “DOTA O Ako” at tinawag si Vanessa bilang kanyang “Patner.”
“Mahal na mahal ko tong Patner kong to eh 🥹💔 Mamamalagi siya sa Puso ko. Isa sa mga Tunay at Mapagmahal na Kapatid!” saad niya.
Sa isa pa niyang post, sinabi ni Aikee: “As artists, we dream of being in the spotlight, but this isn’t the kind of spotlight we ever wanted. 🥹😭💔”
Bago siya nakilala sa content creation at bilang vocal coach, naging bahagi rin si Vanessa ng Sugarpop, ang singing group na nabuo mula sa mga finalist ng GMA's Popstar Kids. Kabilang sa grupo sina Julie Anne San Jose, Rita Daniela, Enzo Almario at Pocholo Bismonte.
Matapos ang balita, nagbalik-tanaw ang kanyang mga dating ka-grupo sa kanilang mga pinagsamahan. Ibinahagi ni Julie Anne ang mga lumang larawan nila ni Vanessa at sinabi niyang nakaplano pa sana ang kanilang reunion.
“Wani, still can't believe it... Plano pa naman natin mag-reunion. Sugarpop will never be the same without you. Rest in Heaven, Wani,” ani Julie Anne.
Nagbahagi rin si Pocholo ng mga lumang larawan at alaala nila ni Vanessa, habang si Rita ay nag-post ng mga kantang kanilang pinagsamahan bilang Sugarpop, kabilang ang “Mahal Kita,” “You Life Me Up,” at “Paraiso.”
Samantala, nagbahagi si Enzo ng isang lumang mensahe ni Vanessa para sa kanilang Sugarpop family.
“Sad that this will never happen anymore. Gone too soon my Sagittarius and co-bunso sister.”
Para sa mga nais magbigay-galang, maaaring dalawin ang burol ni Vanessa sa Loyola Memorial Chapels sa Commonwealth, Quezon City. Inanunsiyo ng pamilya na magsisimula ang public viewing sa Agosto 21, 2026, alas-6 ng gabi. Ang iba pang detalye tungkol sa kanyang interment ay ipaaalam pa ng pamilya.
Kasunod ng unang balita tungkol sa pagpanaw ni Vanessa, iniulat ng KAMI ang pagkumpirma ng kanyang pinsang si Ivy at ang pagkakakilala sa kanya bilang mang-aawit ng “DOTA O Ako.” Sa naturang ulat, binigyang-diin din ang pakiusap ng pamilya na bigyan sila ng panahon at privacy habang nagluluksa.
Matapos naman ang kanyang pagpanaw, nagbigay-pugay si Rita Daniela, dating ka-grupo ni Vanessa sa Sugarpop. Ibinahagi niya sa Instagram Stories ang anunsiyo ng pamilya at ilang awitin ng grupo, kabilang ang “You Lift Me Up” at “Paraiso,” bilang pag-alala sa dating kasama.
Bagong feature: Tingnan ang mga balitang para sa'yo ➡️ hanapin ang "Recommended for you" block at mag-enjoy!
Source: KAMI.com.gh
