Asawa ni Andy Byron, dinelete ang social media kasunod ng Coldplay concert viral video

• Viral sa TikTok ang video ng CEO ng Astronomer na si Andy Byron at HR head Kristin Cabot na magkaakbay sa Coldplay concert
• Marami ang nagsabing tila may relasyon ang dalawa kahit pareho silang may asawa
• Tinanggal ng misis ni Byron ang apelyidong “Byron” sa social media at dineactivate ang kanyang account
• Nagdulot ng backlash online ang video, lalo na matapos ang komentaryo ni Chris Martin tungkol sa kanila

Isang Coldplay concert sa Gillette Stadium ang naging mainit na usapin sa social media matapos mahuli sa kamera ang Astronomer CEO Andy Byron na kayakap ang kanyang HR chief na si Kristin Cabot—isang sandaling tila nagpahiwatig ng higit pa sa pagiging magka-trabaho.

Sa isang viral TikTok clip na umabot na sa mahigit 20 milyong views, makikitang nakatayo nang magkadikit sina Byron at Cabot habang tinutugtog ang isa sa mga hit ng banda. Nang umikot ang “kiss cam” segment ni Coldplay frontman Chris Martin, nasapul ang dalawa. Sabay ang hirit ni Martin: “Look at these two.” Si Cabot ay agad na tumalikod habang si Byron ay yumuko—isang kilos na marami ang nagsabing parang gustong umiwas sa pagkakakilanlan.

Nagbiro pa si Martin sa mic: “Either they’re having an affair or they’re just very shy,” na siyang lalong nagpasiklab ng espekulasyon online.

Sa loob lamang ng ilang oras matapos sumabog ang video, napa-focus ang pansin ng netizens sa asawa ni Byron na si Megan Kerrigan Byron. Mabilis namang napansin ng ilang netizens na hindi na ma-access ang kanyang Facebook profile pagsapit ng Huwebes. Ngunit bago ito tuluyang mawala online, binago ni Megan ang pangalan niya sa profile—tinanggal ang “Byron,” na para sa marami ay tahimik pero malinaw na pahiwatig ng pagkadismaya o posibleng hiwalayan.

Ayon sa mga source online, binaha ng comments ang kanyang account, karamihan ay nagpapaabot ng suporta habang ang iba ay naghahanap ng sagot.

Si Kristin Cabot ay sumali sa Astronomer bilang Chief Human Resources Officer noong Nobyembre 2024. Ang Astronomer ay isang kilalang kumpanya sa larangan ng AI at data intelligence na may halagang $1.2 bilyon. Nang i-welcome siya noon ng kumpanya sa pamamagitan ng isang press release at LinkedIn post, pinuri ang kanyang higit 20 taong karanasan sa HR. Ngunit kasunod ng kontrobersyang ito, tahimik nang nawala ang nasabing mga post mula sa online platforms ng Astronomer.

Ngayon, si Cabot at Byron ay parehong nasa ilalim ng matinding scrutiny habang nananatili pa rin sa kanilang mga posisyon sa kompanya.

Habang ang ibang Coldplay fans ay nag-enjoy sa kilig at music, ang aktres na si Ruffa Gutierrez ay nagpa-wow sa netizens sa kanyang “epic date” sa Venice para panoorin ang bandang Coldplay. Sa kanyang post, makikitang punong-puno ng kilig at kasiyahan si Ruffa habang pinapanood ang concert.

Maging si Pangulong Bongbong Marcos ay hindi nagpahuli sa Coldplay fever. Sa kanyang social media post, sinabi niyang hindi raw dapat palampasin ang ganitong klaseng concert experience. Masaya at relaxed si BBM sa mga kuha sa kanya habang nasa concert venue.

Source: KAMI.com.gh