Dahil sa isang aso, natuklasan ang bangkay ng nawawalang 12-anyos sa Toledo City

• Natagpuang wala nang buhay ang 12-anyos na si Crystal Joy Abarquez sa isang madamong bahagi ng Barangay Ibo sa Toledo City matapos ang walong araw na paghahanap
• Dahil sa aso na si Meyat at natuklasan ang bangkay ng biktima na nasa advanced state of decomposition na at nakatali pa sa isang puno
• Naaresto ang suspek na si Rowel Villapaña Jr. na napag-alamang pangalawang pinsan pala ng biktima at may dati ring kinakaharap na kaso sa Iloilo
• Nagpahayag ng matinding galit at pakikiramay si Cebu Governor Pamela Baricuatro sa pamilya habang ipinag-uutos ang masusing imbestigasyon sa insidente

Bumuhos ang emosyon sa Toledo City, Cebu matapos ang walong araw na pag-aalala para sa kaligtasan ng batang si Crystal Joy Abarquez. Ang 12-anyos na graduating Grade 6 pupil ay huling nakitang buhay noong Pebrero 11, matapos niyang hindi sumama sa kanyang mga kapatid papunta sa bahay ng kanilang lola dahil abala ito sa kanyang cellphone.

Read also

Netizens, naantig sa sitwasyon ng unggoy na si Punch sa Ichikawa City Zoo

Ayon sa kanyang inang si Christine, masakit isipin na sa ganitong paraan magtatapos ang paghahanap sa kanyang ikalawang anak. Lalo pang naging mahirap tanggapin para sa pamilya nang malaman na ang itinuturong suspek ay ang sariling kamag-anak na si Rowel Villapaña Jr., na pinsan ng ina sa ikalawang antas.

Dahil sa aso at natuklasan ang bangkay ni Crystal Joy noong Pebrero 19 sa isang liblib at madamong lugar sa Barangay Ibo. Ang asong si "Meyat" ang naging instrumento upang matunton ang kinaroroonan ng bata na nasa kalunos-lunos na kalagayan. Sa tulong ng CCTV footage na sinuri ng Toledo City Police Tracker Team, nakita ang biktima na lulan ng isang motorsiklo kasama ang suspek noong hapon ng kanyang pagkawala.

Bagama't itinanggi ni Villapaña ang paratang, narekober naman ng mga pulis ang motorsiklong nakita sa video. Sa background check, lumabas na may kinakaharap ding mga kaso ng r@pe ang suspek sa Iloilo bago ito lumipat sa Toledo noong 2021. Inaasahang sasampahan siya ng kasong murder ngayong Lunes, Pebrero 23, habang hinihintay ang resulta ng autopsy.

Read also

Gary Valenciano, may mahalagang paalala kay Alvin Aragon tungkol sa pagbabahagi ng pananampalataya

Ang pangyayaring ito ay umani ng matinding galit mula kay Cebu Governor Pamela Baricuatro, na naniniwalang posibleng impluwensya ng iligal na droga ang nagtulak sa krimen. Agad siyang nag-utos sa kapulisan na paigtingin ang kampanya laban sa droga at nagpaabot ng pakikiramay sa pamilya Abarquez.

Sa kasalukuyan, patuloy ang imbestigasyon upang malaman kung may iba pang sangkot sa nasabing krimen. Ang trahedyang ito sa Cebu ay isa lamang sa mga nakapanlulumong ulat tungkol sa seguridad ng mga kabataan na naitampok din sa mga nakaraang balita.

Kaugnay nito, naging usap-usapan din ang kaligtasan ng mga bata sa ibang panig ng bansa. Ayon sa ulat ngKami.com.ph, dalawang batang magkapatid sa Davao de Oro ang natagpuan ding wala nang buhay sa loob ng kanilang sariling silid. Ang insidenteng ito ay nag-iwan ng matinding trauma sa kanilang pamilya habang patuloy na naghahanap ng hustisya ang mga awtoridad para sa mga biktima.

Sa kabilang banda, isa ring malungkot na balita ang nanggaling sa Bayambang tungkol sa isang sanggol na natagpuang nakabaon sa isang bukid. Sa ulat ngKami.com.ph, sinubukan pang isalba ng mga doktor ang buhay ng sanggol matapos itong mahukay, ngunit sa kasamaang palad ay hindi na ito umabot nang buhay. Ang mga ganitong balita ay patuloy na nagpapaalala sa publiko tungkol sa kahalagahan ng pagbabantay sa ating mga mahal sa buhay.

Source: KAMI.com.gh