Delivery rider, pilit sinasalba ang lumubog na bisikleta sa abot-baywang na baha sa Maynila

• Nadurog ang puso ng netizens sa viral video ng delivery rider na lumusong sa abot-baywang na baha para iligtas ang bisikleta sa Maynila
• Ayon sa uploader, isinandal lang muna ng rider ang bike sa poste bago dumaan ang isang bus na nagpaalon dito
• Kinilala ang uploader na si Junel Ryan Collamat na agad naghanap ng paraan para matulungan ang rider
• Maraming netizens ang nagpahayag ng kagustuhan na magpaabot ng tulong matapos maging viral ang video

Isang nakakaantig na eksena ang nag-viral sa social media matapos makuhanan ng video ang isang food delivery rider na pilit inililigtas ang kanyang bisikleta mula sa abot-baywang na baha sa Pedro Gil Station, Maynila, nitong Agosto 22.

Makikita sa naturang video na in-upload ni Junel Ryan Collamat ang matinding hirap ng rider habang sinasalba ang kanyang bisikleta na halos matangay ng malakas na alon mula sa isang bus na dumaan sa baha. Ang simpleng bisikleta na iyon ang kanyang pangunahing gamit sa paghahanapbuhay at tanging sandata laban sa hirap ng araw-araw.

Read also

9-anyos na batang nahulog sa kanal sa kasagsagan ng ulan, patay na ng matagpuan

Ayon sa kwento ng uploader, bago pa man mangyari ang insidente ay isinandal lamang muna ng rider ang kanyang bisikleta sa poste para makasilong saglit sa ulan. Ngunit ilang minuto lang ang lumipas, isang bus ang dumaan at naghatid ng malakas na alon na siyang tumangay sa bike. Walang pag-aalinlangan, lumusong ang rider sa baha at pilit na hinabol ang kanyang bisikleta.

“Na contact ko na si kuya at nag video call para kausapin dahil madaming gustong magpadala ng tulong sa kanya,” pahayag ni Collamat sa IBC Digital. Sa sandaling iyon, umapaw ang simpatya at paghanga ng publiko sa tiyaga at determinasyon ng rider na hindi basta sumusuko.

Dahil sa viral video, maraming netizens ang nagpahayag ng kagustuhan na mag-abot ng tulong. Para sa iba, simbolo ang rider ng tunay na sakripisyo at pagsusumikap para maitaguyod ang pamilya gamit ang maliit na kinikita mula sa food delivery service. Sa kabila ng hirap at peligro, pinipili nilang magpatuloy para lang masigurong may uuwiang pagkain at kita sa dulo ng araw.

Read also

32-anyos na babae, natagpuan ang ina na nawalay sa kanya ng 30 taon dahil sa isang livestream

Ang mga food delivery rider ay itinuturing na modernong frontliners ng kabuhayan sa bansa. Sa araw-araw, hinaharap nila ang matinding init ng araw, malakas na ulan, at panganib sa kalsada para lamang maihatid ang pagkain o gamit sa mga customer. Kadalasan, sila ay naka-motor o bisikleta—at tulad ng viral rider sa Maynila, ang kanilang sasakyan ay hindi lamang gamit sa trabaho kundi isa ring pangunahing puhunan para sa kanilang kabuhayan. Dahil dito, hindi nakapagtataka na lumusong ang rider sa baha para ipaglaban ang kanyang bisikleta—dahil ang pagkawala nito ay para na ring pagkawala ng kanyang hanapbuhay.

Sa kabilang banda, hindi lahat ng balita tungkol sa mga rider ay positibo. Nitong Agosto lamang, isang delivery rider ang nahuli matapos umanong sangkot sa fake holdup modus sa Quezon City. Ayon sa imbestigasyon, ginamit daw ng rider ang kanyang trabaho bilang panangga para magmukhang inosente, ngunit nabisto kalaunan ang umano’y iligal na gawain. Ang insidente ay nagdulot ng matinding usapin tungkol sa kredibilidad ng mga rider at kung paano naaapektuhan ang imahe ng mga totoong marangal na nagtatrabaho sa industriya.

Read also

Meralco technician, patay sa pamamaril sa Dasmariñas, Cavite

Samantala, nag-trending din kamakailan ang kwento ng isang delivery rider na naging literal na life-saver. Ibinahagi ni Kara David kung paanong isang rider ang nagligtas ng buhay matapos niyang bigyan ng agarang tulong ang isang taong nangangailangan. Sa halip na simpleng trabaho lamang, ipinakita ng rider na handa siyang tumulong kahit sa gitna ng personal na hirap. Ang naturang kabayanihan ay nagbigay inspirasyon sa publiko at nagpapatunay na maraming delivery riders ang tunay na bayani sa kalsada.

Source: KAMI.com.gh