Aiko Melendez, pabor sa panukala ni Robin Padilla: “Correct law ‘yan”

• Pabor si Aiko Melendez sa panukalang batas ni Sen. Robin Padilla na nagpapababa ng minimum age of criminal liability
• Naniniwala si Aiko na dapat managot sa batas ang sinumang lumabag dito, anuman ang kanilang edad
• Binanggit ni Aiko sa kaniyang post na ang batas ay dapat naaayon sa bigat ng kasalanan, lalo na kung seryosong krimen ang sangkot
• Sumang-ayon rin ang komedyanteng si Eric Nicolas na dapat may pananagutan kahit ang batang edad sampu kung may matinding krimen na ginawa

Matapang at diretsahang ipinahayag ng aktres at Quezon City Councilor na si Aiko Melendez ang kanyang suporta sa panukalang-batas ni Senador Robin Padilla na layong amyendahan ang Juvenile Justice and Welfare Act of 2006.

Ang panukala ay naglalayong ibaba ang edad ng mga batang maaaring masampahan ng kasong kriminal, lalo na kung sangkot sa heinous crimes gaya ng pagpatay at panggagahasa.

Sa isang post sa kanyang verified Facebook account, inilahad ni Aiko ang kanyang pananaw, kasabay ng pagbabahagi ng ulat tungkol sa panukala ni Padilla. “That’s the correct law,” ani Aiko, at iginiit na walang dapat nakatataas sa batas, kahit pa menor de edad. Para sa kanya, ang sinumang lumabag sa batas ay dapat managot depende sa bigat ng kasalanan—“irregardless of age.”

Isa ring komedyante at personalidad sa industriya ng showbiz na si Eric Nicolas ang nagpahayag ng pagsang-ayon sa pananaw ni Aiko. Ayon sa kanya, “ANG SAMPUNG TAONG GULANG AY NAKAKAPAG ISIP NA NG TAMA AT MALI.” Dagdag pa niya, nararapat lang na managot ang sinumang kabataang sangkot sa matitinding krimen, at dapat ding magsilbing aral ito sa mga magulang at kabataan.

Ang Republic Act No. 9344, na layong protektahan ang karapatan ng mga kabataan, ay isa sa mga batas na isinulong noon ni Senador Kiko Pangilinan. Sa kasalukuyan, umaani ito ng iba’t ibang opinyon—may mga pabor at may matinding tutol. Sa panig ni Aiko Melendez, malinaw ang kanyang posisyon: hustisya ang dapat manaig, bata man o matanda.

Bilang isang public servant at ina rin, kilala si Aiko sa pagiging bukas sa mga isyung may kinalaman sa kabutihang panlipunan. Sa mga nagdaang buwan, naging bukas din siya sa kanyang personal na laban—partikular na sa kanyang health journey. Kamakailan, ibinahagi niya ang kanyang struggles sa pagtaas ng timbang at iniindang kondisyon sa kalusugan, kung saan naging emosyonal siya sa pakikibaka nito habang ginagampanan ang kanyang trabaho bilang artista at konsehal.

Dagdag pa rito, inilahad din ni Aiko sa isang panayam na kahit huli na raw niya sinimulan ang seryosong pag-aalaga sa kanyang kalusugan, naniniwala siyang hindi pa huli ang lahat para magbago ng lifestyle. Aniya, mahalagang unahin ang kalusugan hindi lang para sa sarili kundi para sa mga mahal sa buhay na umaasa sa kanya.

Ang kanyang paninindigan sa isyu ng criminal liability ay isa lamang sa mga patunay na bukas si Aiko Melendez sa diskursong pampulitika at panlipunan, at hindi takot na ipahayag ang kanyang saloobin—lalo na kung naniniwala siyang makabubuti ito para sa mas nakararami. Sa kanyang mga pahayag, tila ba hindi lamang siya isang artista sa harap ng kamera, kundi isa ring responsableng lingkod-bayan na handang manindigan sa kung ano ang tingin niyang tama.

Source: KAMI.com.gh