Lola, binigyan ng isang taong supply ng Ovaltine matapos mag-viral

• Isang senior citizen ang nabigyan ng isang taong supply ng Ovaltine matapos siyang bayaran ng expired na produkto kapalit ng paglalaba
• Ang panloloko ay isinumbong ng kanyang apo sa social media at agad na nag-viral ang kwento
• Bumisita ang mga empleyado ng Ovaltine Philippines sa bahay ng lola upang personal na iabot ang tulong
• Pinuri ng netizens ang ginawang hakbang ng kumpanya at kinondena ang kapitbahay na nanlamang sa matanda

Maraming netizens ang naantig ang puso sa istorya ng isang senior citizen na ginamit bilang labandera ng isang kapitbahay at binayaran lamang ng expired na pagkain—kabilang na ang Ovaltine. Sa kabila ng panlolokong ito, bumuhos ang pagmamalasakit matapos na tumugon ang mismong Ovaltine Philippines sa viral post na naglantad sa nangyari.

Ayon sa video na ibinahagi sa platform na X (dating Twitter), personal na bumisita ang mga empleyado ng Ovaltine sa tahanan ng matanda upang mag-abot ng isang taong supply ng kanilang produktong malted chocolate drink. Sa video, makikitang may mga kahon ng Ovaltine na ipinasok sa bahay ng lola, na bagaman hindi pinangalanan, ay kapansin-pansing natuwa at nagpasalamat.

Ang kwento ay unang ibinahagi ng apo ng lola sa social media, kung saan ibinunyag niya ang nakakadurog-pusong detalye ng panloloko.

“Kitang-kita ko kung paano n’yo bigyan ng puro expired na pagkain ang lola ko,” ani ng apo sa kanyang post. “Pinaglalaba n’yo maghapon kapalit ng expired na pagkain na tuwang-tuwa naman siya kase hindi niya alam.”

Umani ito ng libo-libong reaksyon mula sa publiko, at agad na nag-viral ang kwento. Marami ang nagpahayag ng galit sa sinapit ng matanda at humanga sa agarang aksyon ng Ovaltine. Ayon sa ilang netizen, naging simbolo ng malasakit ang kompanya sa panahong napakaraming kaso ng panlilinlang sa mga nakatatanda.

Ang istorya ng lola ay isa lamang sa maraming insidente kung saan nalalagay sa alanganin ang mga senior citizen sa kamay ng mapagsamantalang kapwa. Habang marami sa kanila ay nagtitiis sa hirap ng buhay at patuloy pa ring naghahanapbuhay, may ilan na sinasamantala ang kanilang kahinaan at kawalan ng kaalaman sa ilang sitwasyon.

Ang viral post ay hindi lamang nagpakita ng panloloko kundi pati na rin ang kahalagahan ng pagmamalasakit mula sa mga pribadong kumpanya at ng social media bilang plataporma para sa katarungan.

Isang nakakabiglang insidente ang naganap nang mahulog mula sa ikatlong palapag ang isang 102-anyos na lola matapos mapagkamalan na pinto ang bintana. Bagamat nagtamo ng mga pinsala, masuwerteng nakaligtas ang matanda. Agad siyang dinala sa ospital at ngayon ay nagpapagaling. Patuloy ang paalala ng mga kaanak na bantayang mabuti ang mga nakatatanda upang maiwasan ang ganitong trahedya.

Isang 67-anyos na lola ang naging biktima ng matinding pananakit nang kinaladkad siya ng isang isnatser sa gitna ng kalsada para makuha ang kanyang bag. Nagtamo siya ng pasa at galos sa katawan. Dahil sa kuha ng CCTV, mabilis na natukoy ang suspek na ngayon ay pinaghahanap ng pulisya. Maraming netizen ang nanawagan ng hustisya at mas mahigpit na proteksyon para sa mga nakatatanda.

Source: KAMI.com.gh