Jose Manalo, binalikan ang pinakamemorable na karanasan na hanggang ngayon ay "nanunuot" pa rin

• Inamin ni Jose Manalo sa panayam ni Toni Gonzaga na ginamit niya ang pagkakataon noong nahulog siya sa kanal para humiling ng umento sa sahod
• Ikinuwento ng komedyante ang naging pag-aalala ng kaniyang 'Sir' matapos ang viral na insidente sa Malabon noong taong 2016
• Sa kabila ng takot na mainom ang tubig sa kanal ay pinili ni Jose na manatiling kalmado at mabilis na umahon para sa kaniyang trabaho
• Inamin ng host na dahil sa tindi ng naging karanasan ay hanggang ngayon ay tila nanunuot pa rin sa kaniyang panaginip ang amoy ng nasabing lugar

Sa pinakabagong episode ng "Toni Talks" na ipinalabas nitong Linggo, Marso 15, muling nagbigay ng saya at inspirasyon ang batikang komedyanteng si Jose Manalo. Sa kaniyang pakikipagkuwentuhan kay Toni Gonzaga, hindi naiwasang maitanong ang tungkol sa kaniyang mga hindi malilimutang karanasan sa longest-running variety show na "Eat Bulaga," partikular na sa sikat na segment na "Sugod Bahay."

Read also

Isang netizen, naantig sa ginawa ni Kuya Kim Atienza sa oras ng kaniyang pangangailangan

Nang tanungin ni Toni kung ano ang pinakatumatak na alaala niya, mabilis na sumagot si Jose tungkol sa kaniyang viral na aksidente. "No’ng nalaglag ako sa kanal. Talagang Malabon. [...] Hindi sa nakita sa camera. Pero naka-video," pag-alala ni Jose. Ayon sa kaniya, sa bilis ng pangyayari ay ang kaligtasan niya agad ang kaniyang naisip. "Inisip ko, hindi ako hihinga. Hindi ko ibubuka ang bibig ko. Aahon agad ako," dugtong pa niya.

Ngunit ang hindi alam ng marami ay ang sumunod na kaganapan matapos ang insidente. Dahil sa pag-aalala, agad umanong tumawag ang kaniyang 'Sir' o ang boss sa produksyon upang kumustahin ang kaniyang kalagayan. "Anong nangyari? May mga open wound ka ba? sabi sa akin. Mayro’n po, [sagot ko]. Nasaan? Ito po ‘di ba ‘yong nasa mukha ko," biro ni Jose.

Sa gitna ng seryosong pag-aalala ng kaniyang boss kung may nainom ba siyang tubig mula sa kanal, nakita ni Jose ang pagkakataon na magbiro at humiling para sa kaniyang kinabukasan. "Sabi niya [ni Sir], ‘hindi ‘yan! Puro ka kalokohan. Nag-aalala kami sa ‘yo. May nainom ka ba? [...] Anong gusto mo?’ Sabi ko, Sir, dagdagan n’yo po ‘yong sahod namin," lahad ng komedyante.

Read also

Carlo Aquino, hinarap ang matinding takot sa isang eksena sa "A Special Memory"

Sa kabila ng katatawanan, inamin ni Jose na talagang tumatak sa kaniyang sistema ang nangyari, sa punto na tila nararamdaman pa rin niya ang bakas ng insidente hanggang sa kaniyang pagtulog. "Gano’n siya kalupit," saad niya. Ang nasabing pagkahulog sa kanal ay naganap noong Hunyo 2016, ngunit hanggang ngayon ay kinikilala pa rin ng mga netizens ang dedikasyon at pagiging propesyonal ni Jose sa kaniyang trabaho.

Si Jose Manalo ay nagsimula sa industriya bilang bahagi ng production crew bago naging isa sa pinakasikat na komedyante at host sa bansa. Ang kaniyang husay sa improvisational comedy at ang kaniyang pagiging "masa" ang naging susi upang mahalin siya ng mga Pilipino sa loob ng ilang dekada. Sa bawat biro at hiling na umento, dala ni Jose ang kuwento ng pagsisikap at katapatan sa sining ng pagpapasaya.

Bago pa man ang kaniyang mga viral na eksena sa telebisyon, dumaan din sa butas ng karayom si Jose Manalo. Sa isa pang pagkakataon, binalikan ng komedyante ang kaniyang mga "humble beginnings" noong nagsisimula pa lamang siya sa "Eat Bulaga" noong 1994, kung saan naging bahagi siya ng pagbuo ng mga programa sa likod ng kamera.

Read also

"Nag-start ako sa ‘Bulaga’ 1994 as a PA..." Jose Manalo, binalikan ang kanyang humble beginnings

Hindi rin nalalayo ang karanasan ng kaniyang on-screen partner na si Wally Bayola pagdating sa mga pagsubok. Kamakailan ay nag-react si Wally sa mga komento ng netizens tungkol sa kaniyang nakaraan, kung saan ipinakita niya ang kaniyang katatagan at pasasalamat sa mga taong patuloy na sumusuporta sa kabila ng mga naging isyu noon.

Source: KAMI.com.gh