Kris Aquino, may matapang na pahayag laban sa mga nagpapakalat ng “death hoax” tungkol sa kanya
- Kris Aquino, binanatan ang mga nagpapakalat ng “death hoax” tungkol sa kanya sa social media
- Ayon sa kanya, “cheap” ang paraan ng paggawa ng pera sa pamamagitan ng ganitong kasinungalingan
- Ibinahagi rin ni Kris ang sakit ng tunay na pagkawala ng mga mahal sa buhay dahil sa karahasan at karamdaman
- Binalaan ng “Queen of All Media” ang uploader ng fake news na huwag siyang galitin
MAKI-TINGIN KA NAMAN: Pwede ka nang mag-comment sa mga artikulo ng KAMI! Subukan mo, madali lang!
Hindi pinalampas ni Kris Aquino ang mga nagpapakalat ng pekeng balita tungkol sa kanyang pagkamatay. Sa isang matapang at emosyonal na Facebook post, binalaan ng tinaguriang Queen of All Media ang mga gumagawa at nagpapalaganap ng mga tinatawag na death hoaxes na paulit-ulit na naglalabas ng maling impormasyon tungkol sa kanyang kalagayan.
Source: Instagram
Matatandaang ilang ulit nang naging biktima si Kris ng mga ganoong klaseng fake news habang patuloy siyang sumasailalim sa paggamot para sa kanyang autoimmune diseases. Dalawang taon siyang nanatili sa Estados Unidos upang magpagamot bago siya muling bumalik sa Pilipinas noong Setyembre ng nakaraang taon.
Sa kanyang post, hindi itinago ni Kris ang inis at pagkadismaya sa mga taong kumikita umano sa pagpapakalat ng kasinungalingan.
“Sa lahat ng mga manghuhula nagsabing malapit na kong mamatay or yung mga nagbalita na patay na ko alam ko you need to make money, but this is a cheap way to do it,” aniya.
Like and share our Facebook posts to support the KAMI team! Share your thoughts in the comments. We love reading them!
Sa gitna ng kanyang maselang kalagayan, nanatiling bukas si Kris sa pag-a-update sa kanyang mga tagasuporta. Kamakailan, napansin ng kanyang mga fans na tila mas gumanda na ang kanyang pangangatawan dahil muli siyang nakakapagpataba. Gayunman, sa likod ng positibong balitang ito, ay may ilan pa ring patuloy na nagpapakalat ng maling impormasyon tungkol sa kanya — dahilan para siya ay muling magsalita.
Nagbalik-tanaw din si Kris sa mga tunay na pagkawala sa kanyang buhay. Aniya, hindi man siya nawalan ng mahal sa buhay dahil sa kalamidad, ramdam niya ang sakit ng kamatayan dahil sa karanasan ng kanyang pamilya.
“I did feel losing a loved one because of a gunshot wound delivered at close range by a man in uniform,” saad niya, patungkol sa pagpaslang sa kanyang ama, dating Senador Benigno “Ninoy” Aquino Jr.
Dagdag pa ni Kris, batid niya rin ang kalupitan ng kamatayan matapos pumanaw ang kanyang ina na si dating Pangulong Corazon Aquino dahil sa stage four colon cancer, at ang kanyang kapatid na si dating Pangulong Noynoy Aquino.
“We sisters were shocked to lose our brother when we thought the fight to live was still there—clearly the suffering he [endured] he never wanted his sisters to know. Because that’s what a kuya is for,” sabi pa niya.
Binigyang-diin ni Kris na alam niya kung gaano kasakit ang mawalan, kaya labis siyang nadidismaya sa mga taong ginagawang katuwaan o pinagkakakitaan ang kamatayan ng iba. Pinuna rin niya ang uploader ng naturang pekeng video na tila gustong saktan siya.
“Lay off me because mumultuhin kita although medyo malayo ka na sa listahan ng mga may atraso sa kin and yet I turned the other cheek,” pabirong babala ng dating aktres.
Sa huli, pinaalalahanan ni Kris ang publiko na maging maingat sa pagpapakalat ng impormasyon at igalang ang kalagayan ng mga taong may pinagdaraanan. Patuloy rin siyang nagpapasalamat sa mga tagahanga at kaibigan na hindi nagsasawang magpadala ng panalangin at suporta habang siya ay patuloy na lumalaban sa kanyang karamdaman.
Si Kris Aquino ay isa sa pinakatanyag na personalidad sa showbiz, kilala bilang Queen of All Media dahil sa kanyang matagumpay na karera sa telebisyon, pelikula, at advertising. Bukod sa kanyang pagiging aktres at host, isa rin siyang negosyante at philanthropist. Sa mga nagdaang taon, humarap si Kris sa serye ng autoimmune diseases, dahilan upang pansamantala siyang manirahan sa Amerika para sa gamutan.
Sa kabila ng mga pagsubok sa kalusugan, patuloy siyang nagbibigay ng inspirasyon sa kanyang mga tagasubaybay sa pamamagitan ng kanyang social media updates — kadalasan ay may halong pag-asa, pananampalataya, at pagmamahal para sa kanyang mga anak na sina Josh at Bimby.
Sa nasabing balita, ipinakita ni Kris ang buong suporta sa bagong interes ng anak niyang si Bimby sa larangan ng musika. Ibinahagi ng TV personality ang mga larawan ng kanyang anak na kasalukuyang kumukuha ng vocal lessons sa ilalim ng kilalang singer at coach na si Thor Dulay. Maraming fans ang natuwa sa pagkakaroon ni Bimby ng bagong passion, lalo na’t kitang-kita ang saya ni Kris sa pag-unlad ng kanyang anak.
Sa isa pang ulat, ibinahagi ni Kris ang mga bagong video ng kanyang anak habang nag-eensayo sa studio. Ayon kay Kris, masaya siyang nakikita si Bimby na nagpupursige sa kanyang mga aralin sa musika at performance. Sa kabila ng kanyang mga karamdaman, nananatiling inspirasyon ni Kris ang kanyang mga anak na siyang dahilan kung bakit patuloy niyang nilalabanan ang kanyang sakit.
Bagong feature: Tingnan ang mga balitang para sa'yo ➡️ hanapin ang "Recommended for you" block at mag-enjoy!
Source: KAMI.com.gh
