Vice Ganda, umapela ng “tax holiday” dahil sa malawakang korapsyon

• Vice Ganda, naglabas ng matapang na pahayag laban sa katiwalian matapos ang kontrobersya sa flood control projects
• Sa It’s Showtime, ipinahayag niya ang sama ng loob ng taumbayan sa patuloy na pagbabayad ng buwis kahit may anomalya
• Naniniwala siya na dapat magkaroon ng “tax holiday” hangga’t hindi naibabalik ang ninakaw na pondo ng bayan
• Ang kanyang pahayag ay kasabay ng imbestigasyon ng Independent Commission for Infrastructure (ICI) sa bilyon-bilyong pondong sangkot sa korapsyon

Hindi na nagpatumpik-tumpik si Vice Ganda sa pagpapahayag ng kanyang saloobin ukol sa malawakang korapsyon na kinasasangkutan ng mga flood control projects ng pamahalaan.

Sa live episode ng It’s Showtime, hindi napigilan ng komedyante-host na magbigay ng matinding reaksyon matapos marinig ang hinaing ng isang kalahok tungkol sa buwis na ibinabayad ng taumbayan ngunit tila nauuwi lamang sa bulsa ng mga tiwaling opisyal.

Sa kanyang mapanindigang pahayag, idiniin ni Vice: “Hindi pwedeng ninakaw niyo yung tax namin tapos magbabayad pa di kami. Ibalik niyo muna yung ninakaw niyo sa’min, di ba?”

Read also

Doctor-content creator, may makabuluhan na pahayag tungkol sa kahulugan ng "failure"

Kasabay nito, ipinanukala niya na dapat magkaroon ng “tax holiday”, o pansamantalang suspensyon ng buwis, hangga’t hindi naaayos ang mga kontrobersiya at hindi nananagot ang mga sangkot na opisyal. Para kay Vice, napakabigat ng pasanin sa mga ordinaryong Pilipino na araw-araw na kinakaltasan ang kita, habang ang mga tiwaling nasa puwesto ay patuloy na nabubuhay nang marangya.

Ang kanyang pahayag ay umalingawngaw sa gitna ng inilunsad na imbestigasyon ng Independent Commission for Infrastructure (ICI), na layong siyasatin ang bilyon-bilyong pisong pondo para sa flood control projects. Marami ang nagdududa kung ang mga pondong ito ay tunay na ginamit sa proyekto, lalo na’t patuloy ang pagbaha at kawalan ng maayos na imprastraktura sa maraming lugar.

Para kay Vice, hindi lang ito tungkol sa pera kundi tungkol sa katarungan. Aniya, habang ang mga Pilipino ay nagbabayad ng buwis mula sa kanilang pawis at hirap, tila nagiging alipin lamang sila ng sistemang pinatatakbo ng mga tiwaling lider.

Read also

Darryl Yap sinagot ang pahayag ni Lav Diaz: "I respectfully nominate BB gandanghari as President"

Si Vice Ganda ay isa sa mga pinakamalaking pangalan sa industriya ng showbiz sa Pilipinas, na kilala hindi lamang sa kanyang pagpapatawa kundi pati na rin sa kanyang matapang na paninindigan sa mga isyu sa lipunan. Bagama’t ilang beses nang inalok na pumasok sa politika, nanatili siyang bukas sa pagbibigay ng kanyang pananaw sa mga pambansang isyu, lalo na kung ito’y may kinalaman sa karaniwang Pilipino.

Sa gitna ng naging pahayag ni Lav Diaz na dapat tumakbo si Vice Ganda laban kay VP Sara Duterte sa 2028 elections, agad namang nag-react si Darryl Yap at nag-post ng art card kung saan idineklara niya ang kanyang nominasyon kay BB Gandanghari bilang presidente. Umani ng samu’t saring reaksiyon ang naturang post mula sa netizens.

Sa kabila ng kanyang matapang na mga pahayag laban sa katiwalian, pinakita rin ni Vice Ganda ang kanyang kabutihan nang tuparin niya ang Christmas wish ng isang contestant sa Showtime. Ang simpleng pagtulong na ito ay muling nagpapatunay sa kanyang malasakit sa kapwa at sa ordinaryong Pilipino.

Source: KAMI.com.gh