Jolo Revilla sa pagpanaw ni Lolit Solis: "Lubos po kami nagdadalamhati sa iyong pagkawala"

• Isa sa mga unang nagpahayag ng kanyang pakikidalamhati sa pagpanaw ni Lolit Solis ay si Cavite 1st District Congressman Jolo Revilla
• Nagpasalamat din si Jolo kay Lolit na nagsilbing manager niya nang minsan niyang pasukin ang mundo ng showbiz
• Hulyo 3 nang pumanaw ang beteranang showbiz columnist, talk show host at talent manager
• Kinumpirma ito ng kanyang anak na si Sneezy sa GMA News at inihayag din ang dahilan ng pagkamatay ng ina

Isa sa mga unang nagpahayag ng kanyang pakikidalamhati ay si Cavite 1st District Congressman Ramon Jolo Revilla III, anak ni dating senador Bong Revilla.

Sa kanyang Facebook post, ipinaabot ni Revilla ang kanyang taos-pusong pasasalamat kay Lolit Solis sa pagmamahal at malasakit na ibinigay nito sa kanilang pamilya, lalo na sa kanyang ama.

“Salamat sa lahat ng pagmamahal at pagsuporta mo sa aming buong pamilya lalo na kay papa,” ani Jolo.

Dagdag pa niya, lalo silang nagdadalamhati sa pagpanaw ni Solis dahil ito rin ang tumayong manager niya nang siya’y pumasok sa mundo ng showbiz. Malaki raw ang utang na loob nila sa lahat ng gabay at pag-aaruga ni Solis sa kanilang pamilya at sa kanyang personal na karera bilang artista noon.

Read also

Pamilya ni Robin Padilla, nabahala sa online event na “sunugin si Robin”

“Lubos po kami nag dadalamhati sa iyong pagkawala.,” dagdag ni Revilla.

Si Lolit Solis ay kinilala hindi lamang bilang isang matapang at mapanuring kolumnista kundi bilang isang ina-inahan at kaibigan sa maraming artista at personalidad sa industriya. Ang kanyang biglaang pagpanaw ay nag-iwan ng matinding lungkot sa kanyang mga kaibigan, kasamahan, at mga humahanga.

Patuloy ang pagbuhos ng pakikiramay mula sa iba’t ibang panig ng showbiz at pulitika para sa yumaong icon ng industriya.

Pumanaw ang beteranang showbiz columnist at talent manager na si Lolit Solis noong Hulyo 3, 2025, sa edad na 78, matapos ang mahaba at matinding laban sa iba’t ibang karamdaman.

Kinumpirma ng kanyang anak na si Sneezy sa GMA News na binawian ng buhay si Lolit sa ospital dahil sa atake sa puso, bunga ng komplikasyon mula sa kanyang matagal nang sakit sa bato at puso.

Si Lolit ay matagal nang sumasailalim sa regular na dialysis mula pa noong 2022 matapos siyang ma-diagnose ng chronic kidney disease. Hindi lamang ito ang kanyang hinarap, sapagkat noong 2023 ay nagkaroon din siya ng mild stroke, acute kidney infection, at pneumonia, na lalong nagpahina sa kanyang katawan. Noong Oktubre ng parehong taon, na-ospital siya dahil sa tubig sa baga at matinding impeksyon sa kidney.

Read also

Lolit Solis, sumakabilang buhay na sa edad na 78-anyos

Bagama’t nakabangon mula sa mga naturang karamdaman, patuloy siyang nag-dialysis hanggang sa huling mga buwan ng kanyang buhay. Sa huli, hindi na kinaya ng kanyang katawan ang sunod-sunod na komplikasyon, at binawian siya ng buhay habang ginagamot sa ospital.

Maraming artista at kaibigan sa industriya ng showbiz ang nagpahayag ng kanilang pakikiramay at pag-alala sa alaala ni Lolit bilang isang matapang at makulay na personalidad na nagbigay ng malaking ambag sa larangan ng entertainment journalism at talent management.

Si Lolit Solis ay kilala sa kanyang pagiging matapang at diretsahan bilang kolumnista at host sa mga programang pang-showbiz. Ilan sa kanyang mga naging alaga ay sina Bong at Jolo Revilla, at siya rin ay naging bahagi ng mga mahahalagang programa gaya ng Startalk.

Source: KAMI.com.gh