Matet de Leon, binasag ang pananahimik sa viral live selling breakdown

• Emosyonal na nagsalita si Matet de Leon sa isang TikTok video kaugnay ng pag-iyak niya habang nagla-live selling
• Nilinaw niyang hindi siya naiyak dahil nahihiya siya sa ginagawa niya kundi dahil sa masasakit na komento ng ilang manonood
• Isa sa mga pinakamasakit na natanggap niyang komento ay may kinalaman sa kanyang relasyon sa inang si Nora Aunor
• Sa kabila ng pambabatikos, nagpasalamat si Matet sa mga suki at viewers na patuloy ang suporta at respeto sa kanya

Nagbigay-linaw si Matet de Leon matapos ang emosyonal na eksenang napanood ng publiko sa kanyang viral live selling video kung saan hindi na niya napigilang maiyak sa gitna ng pagbebenta online. Sa isang TikTok video, nilinaw ng aktres na ang kanyang pagluha ay hindi dahil sa kahihiyan sa pagiging live seller, kundi dahil sa isang taong aniya’y “walang puso’t napakawalanghiya.”

“Proud ako maging live seller, lalo na sa mga brands na pinaniniwalaan ko,” ani Matet, na sa kabila ng pinagdaraanan ay patuloy na humaharap para sa kanyang followers. Ibinahagi rin niya ang pasasalamat sa kanyang mga suki at viewers na maayos makitungo tuwing siya’y nagla-live. “Kahit may pinagdadaanan ka, haharap ka pa rin kasi mahalaga ang trabaho mo, mahalaga ang mga taong naniniwala sa ‘yo,” dagdag pa niya.

Habang nagla-livestream, nakatanggap si Matet ng sunod-sunod na mapanakit na komento. Isa sa mga pinakatumatak ay ang linyang, “Suplada ‘to, kaya iniwan ni Ate Guy,” na malinaw na tumutukoy sa masalimuot niyang relasyon sa kanyang inang si Nora Aunor. May ilan ding bumatikos sa kanyang career: “Wala na kayo project?” Sa kabila nito, mas marami pa ring netizens ang nagpahayag ng suporta at paghanga sa pagiging masipag at matatag ni Matet.

“Respeto naman sana,” ani ng isang viewer. “Kahit artista, kailangan din kumayod.” Tinawag pa ng ilan ang kanyang pagkatao bilang “tunay na madiskarte” at “mas may dangal” kaysa sa mga nagpapapansin online. Para sa marami, hindi kahinaan ang pag-iyak ni Matet kundi pagpapakita ng lakas ng loob sa kabila ng pambabatikos.

Isang beteranang aktres at ina, si Matet ay matagal nang kilala sa industriya bilang isa sa mga anak ni Superstar Nora Aunor. Ngunit sa paglipas ng panahon, pinili ni Matet na tahakin ang landas ng isang online seller—isang hakbang na kinikilala ngayon bilang simbolo ng diskarte at resilience sa gitna ng pagbabago ng panahon.

Matagal nang nasa showbiz si Matet de Leon, ngunit naging mas kapansin-pansin ang kanyang lakas ng loob nitong mga nakaraang buwan, lalo na pagkatapos ng pagpanaw ng kanyang ina na si Nora Aunor. Sa isang post na ibinahagi ng Kami.com.ph, inalala ni Matet ang kaarawan ng kanyang yumaong ina at ipinahayag ang pagnanais na sana’y magkasama pa rin sila sa mga mahahalagang okasyon.

Sa isa pang artikulo na nailathala ng Kami.com, ibinahagi niya ang kanyang makadurog-pusong damdamin sa ika-40 days ng pagkamatay ng Superstar. Sa kanyang mensahe, malinaw na dama ang bigat ng pagkawala ngunit kapansin-pansin din ang kanyang determinasyon na magpatuloy sa buhay.

Source: KAMI.com.gh