Ruffa Gutierrez, nakatanggap ng mensahe mula sa babaeng nagsabing karelasyon sya ni Yilmaz

-Si Ruffa Gutierrez ay nakatanggap umano ng mga mensahe mula sa isang babae na nagpakilalang kasalukuyang karelasyon umano ng kanyang dating asawa na si Yilmaz Bektas at tila nagpapakita ng matinding pagka-insecure

-Ayon sa entertainment columnist na si Jun Lalin, mariing pinakiusapan ng naturang babae si Ruffa na huwag na huwag sasang-ayon sa imbitasyon ni Yilmaz na pumunta ng Europe upang muling magkita

-Hindi lamang si Ruffa ang nakatanggap ng mensahe mula sa nasabing babae, kundi pati na rin ang kanyang anak na si Lorin at ang kanyang ina na si Annabelle Rama ay pinadalhan din ng tila mapanghimasok na mensahe

-Sa kabila ng kontrobersya, piniling manahimik ni Ruffa Gutierrez at hindi na lamang pinatulan ang isyu, at hindi rin niya tinanong si Yilmaz Bektas tungkol sa pagkakakilanlan ng nasabing babae upang maiwasan ang gulo

Ibinunyag kamakailan ng aktres na si Ruffa Gutierrez na nakatanggap siya ng mga mensahe mula sa isang babae na umano’y may kaugnayan sa kanyang dating asawa na si Yilmaz Bektas. Ayon sa artikulo ng entertainment columnist na si Jun Lalin para sa Abante, ang nasabing babae ay todo pakiusap kay Ruffa na huwag tanggapin ang imbitasyon ni Yilmaz na pumunta sa Europe.

Bukod kay Ruffa, pinadalhan din umano ng mga mensahe ng naturang babae ang anak ng aktres na si Lorin at ang kanyang ina na si Annabelle Rama. Hindi na lang pinansin ni Ruffa ang mga mensahe at hindi rin siya nagtanong kay Yilmaz kung sino ang babae.

Matatandaan na noong Marso, ibinahagi ni Ruffa na gustong pakasalan siyang muli ni Yilmaz Bektas at nais ng Turkish businessman na bumisita sa Pilipinas. Pagkalipas ng ilang araw, kinumpirma mismo ni Yilmaz na bibisita siya sa kanyang dating asawa. Sa gitna ng mga ulat na ito, lumabas ang isyung may babaeng nagseselos at sinasabing may matagal nang ugnayan kay Yilmaz. Ayon pa kay Jun Lalin, tila “nag-iilusyon” umano ang babae at panay ang komentaryo ukol sa ugali ni Yilmaz.

Hindi na ito pinatulan ni Ruffa, na sa kasalukuyan ay masaya sa kanyang buhay pag-ibig. Nitong taon lamang ay ibinahagi niya sa publiko ang kanyang relasyon sa aktor na si Herbert Bautista. Sa social media, makikita ang kanilang mga sweet moments na tila isang "hard launch" ng kanilang relasyon.

Si Ruffa Gutierrez ay isang kilalang aktres, dating beauty queen, at television host sa Pilipinas. Siya ay kinoronahan bilang 2nd Princess sa Miss World 1993. Ikinasal siya noon kay Yilmaz Bektas, isang Turkish businessman, at nagkaroon sila ng dalawang anak na sina Lorin at Venice. Pagkatapos ng kanilang paghihiwalay, bumalik si Ruffa sa Pilipinas at pinalaki ang kanilang mga anak bilang single mom.

Nag-post si Ruffa ng isang taos-pusong mensahe para kina Yilmaz at sa kanilang mga anak bilang pasasalamat sa mga sandaling pinagsamahan nila. Binanggit niya ang kahalagahan ng pagkakaayos nilang mag-ex sa kapakanan ng kanilang mga anak at ipinahayag ang pasasalamat sa effort ni Yilmaz bilang ama.

Sa kaarawan ni Herbert, naglabas si Ruffa ng isang touching birthday message sa Instagram na umani ng atensyon online. Ipinakita niya ang pagmamahal at pasasalamat sa kanyang partner, na isang kilalang aktor at dating politiko, at tinawag itong “the one who makes me smile.”

Source: KAMI.com.gh